Directora di DIMP, señora Luenne Gomez-Pieters:
ORANJESTAD (AAN): Directora di DIMP, señora Luenne Gomez-Pieters ta enfatisa cu tur negoshi cu ta eherce un actividad economico na Aruba, incluyendo esnan di vehiculonan electronico entre otro e-bikes, e-steps, y e-choppers, mester paga impuesto. Esaki, pa aclarea e mal comprendemento cu tin cu negoshinan no mester paga impuesto riba vehiculonan electronico pasobra nan no ta pasa e keuring di DTI y no por wordo registra na DIMP pa impuesto di vehiculonan di motor.
E impuesto cu nan mester paga, no ta riba e vehiculonan di motor pasobra e vehiculonan electroniconan no ta registra pa paga e impuesto aki. Pero si nan mester paga riba e entrada cu e negoshi ta genera, entre otro, BBO, winstbelasting, si nan tin empleado, nan mester paga loonbelasting y primanan social.
Tambe el a aclarea e malcomprendemento cu si nan ta registra na DIMP pero tin cuenta bancario internacional. El a bisa cu aunke cu tin cuenta unda cu ta rond di mundo, nos leynan fiscal ta regla cu si tin un negoshi cu ta stableci na Aruba, mester paga impuesto riba ingreso mundial. Unda cu ta rond mundo cu ta genera entrada, e ta sigui e lugar na unda e negoshi ta stableci y tambe e ta sigui e luga di biba di e persona individual.
“Mi por tin un cuenta bancario unda cu ta, y ta genera entrada sea riba dividendo, rente, interes y tur otro cos cu mi genera na entrada, mester declara esaki na e pais unda cu mi ta biba. Negoshinan cu ta opera na Aruba, aunke nan tin cuenta bancario internacional, DIMP ta cobra y ta haci sondeonan necesario pa registra e companianan aki”, señora Gomez-Pieters a enfatisa.
