Durante Aruba Lions Health Fair di otro luna
ORANJESTAD (AAN): Manera cu DIARIO a trece dilanti caba, riba Diasabra 3 di Juni, e organizacion social di Aruba Lions Club ta organizando nan ‘Aruba Lions Health Fair 2023’ cu ta destina pa yuda tur esnan di poco recurso, pasa y haya un chekeo medico durante e actividad di feria aki.
Algo di cual Aruba Lions Club ta hopi orguyoso di dje, ta e asina yama trailer ‘The Smile Mobile’. E ta wordo opera pa dos experto local, esta Igor Croes y Magaly Franken, kendenan ta enfoca riba reparacion di dentadura, y tambe limpieza di e djentenan falso aki.
Esey ta loke mas nan ta bay concentra riba dje durante e Health Fair 2023 na comienzo di Juni.
Bo por acudi e dia aki na edificio di Aruba Lions Club den Engelandstraat, unda na e Smile Mobile, bo djente falso lo wordo haci limpi. Fuera nan lo revisa esaki, y dunabo conseho si acaso tin di haci reparacion, cu kizas nan por haci e ora ey mes, of na un otro fecha.
Si acaso abo mes no por bay pa e Health Fair aki, bo por manda un hende cu e dentadura, y automaticamente lo haci esey eynan. DIARIO a compronde cu e Smile Mobile lo ta staciona riba tereno di Aruba Lions Club, cu ta net dilanti di Eagle Tennis Club.
The Smile Mobile ta un proyecto di Aruba Lions Club conoci pa varios aña caba, ta bishita Casnan di Cuido unda ta yuda cu reparacion y limpieza di dentadura di nos hendenan di edad grandi... y e ta gratis.
E actividad ta Diasabra 3 di Juni 2023, for di 9:00 am te cu 3:00 pm. Corda bay trempan pa inscribi pa asina bo ta sigur di lo haya servicio.
