Minister di Husticia Rocco Tjon:
ORANJESTAD (AAN) – Den conferencia di prensa di Gobierno, Diabierna mainta, Minister Rocco Tjon, titular di Asunto Social y Husticia a hiba palabra, y el a elabora tocante e tema di overtime den e Departamento Hudicial.
E mandatario a señala cu e kier a papia riba e tema aki, pasobra e ta ripara cu cierto medionan ta purba saca e tema for di contexto.
Minister Tjon a acentua cu overtime ta algo cu ta toca e situacion financiero di Aruba, y ya Minister di Finanzas Xiomara Maduro a duna un relato amplio tocante con e cifranan aki ta, y kico su impacto ta riba e situacion financiero.
El a agrega cu obviamente ta toca tambe e maneho di personal, y pesey un circular a sali algun tempo atras, emiti pa Minister Presidente, den cual el a papia enberdad di un maximo di 40 ora, pero na mesun momento tambe a puntra tur director, pa entrega un plan con nan ta bay maneha overtime pa nan departamento, pasobra e tin consecuencia tambe pa loke ta trata e parti di seguridad, y vooral ora bo ta wak e departamentonan cu ta resorta bao di husticia.
E mandatario a señala cu pesey, ya caba desde algun siman pasa, a reuni riba e tema aki den e “Justitieel Veiligheidsberaad” cu ta e plataforma den cual e top di husticia ta representa pero tambe nos tabata tin “directeur overleg” cu tur e departamentonan: KPA, CEA, Brandweer, Warda Nos Costa, KIA, Imigracion.
Minister di Husticia a agrega cu den e reunion aki, nan a presenta e plan con nan ta bay percura pa reduccion di overtime, teniendo na cuenta cuater punto cu ta sumamente importante, cu ta: e seguridad cu mester keda brinda na e pueblo, e servicio cu mester keda duna na cada ciudadano, y sin lubida tambe e palabracionnan local y internacional, pa loke ta presencia di entre otro, e hulp dienstnan y cierto infrastructura manera aeropuerto.
E mandatario a bisa cu nan a yega na un plan cu a wordo comunica na e sindicatonan vooral di polis. Comisario a comunica esaki na nan pa toch keda garantiza e seguridad y e seguridad pa nan mes. Kiermen e seguridad externo y interno.
E plan aki ta conta tambe cu aprobacion di e departamento di recurso humano.
Minister Tjon a indica tambe cu diahuebs di e siman aki, el a reuni cu e DRH, y a bolbe evalua e plan cu ya a wordo entrega, y nan ta wak tambe cu e plannan ta dunado e balor agrega, pa loke ta reduccion di overtime, teniendo na cuenta e cuater puntonan di salida.
E mandatario a acentua cu pesey e ta haya importante pa aclarea un ke otro, y pa otro siman tin pendiente un reunion cu tur e sindicatonan cu a solicita esaki.
