Ola di Calor na Aruba
ORANJESTAD (AAN): Si tin weganan di Baseball, Softball, Futbol, of coremento di bicicleta, jogging, y mas... por fabor tene cuenta cu e advertencia emiti pa Departamento Meteorologico Aruba!
Departamento Meteorologico Aruba (DMA) a emiti un “Aviso pa Calor Excesivo”. E advertencia aki ta valido for di Diabierna 12:00 pm te cu Diamars 6:00 pm. Ta papia aki di tempo di calor excesivo cu ta wordo spera e fin di siman aki, y parti di otro siman. Como cu humedad lo bay ta hopi halto, tin biaha lo bo sinti comosifuera temperatura ta sea 40º Celsius, of hasta 45º Celsius.
Corda cu bo curpa por ‘overheat’ facilmente den situacion asina. Corda cu ora bo participa den wega, of ta haci ehercicio, of core bicicleta den tempo asina calor, cu bo ta pone extra stress riba bo curpa. Si bo no tene cuidao ora di haci ehercicio den calor sofocante aki, bo ta riesga di obtene varios malesa serio.
Hungando Softball mes den weekend cu a pasa, un atleta local a bira malo riba Diadomingo. Corda con un persona local cu tabata encarcela den KIA, a bay hunga Basketball den e solo cayente, y na final a djis fayece.
Ehercicio den calor ta peligroso pasobra e por aumenta bo temperatura yama ‘core body temperature’, y esaki lo ponebo bira dehidrata. Esaki por ponebo diripiente ta perde control riba bo curpa, cu ta bay sufri di ‘heat exhaustion’ of tambe un ‘heat stroke’ (conoci na Aruba como ‘zonnestreek’).
Bo mester tuma precaucion special ora di haci ehercicio, of core bicicleta den tempo di calor, e.o. bebe suficiente awa, bisti paña hopi liviano, y evita di haci esaki entre 10:00 am te cu 3:00 pm cu ta e oranan di mas calor.
E malesa cu bo por haya ta wordo yama na ingles ‘Exertional Heat Illness” conoci como EHI. Pasobra produccion di cayente den bo body, tin biaha ta sobrepasa e capacidad di bo curpa pa disipa cayente.
Si muchanan ta hungando weganan di futbol of baseball awe, por fabor introduci varios break durante wega pa asina nan bebe awa. Keda tira bista, pasobra si un mucha ta mustra cu e no kier bebe awa, percura pa bo bay papia cune y insisti pa e bebe awa.
Hasta e fanaticonan cu kizas ta sinta den tribuna, por fabor bebe awa constantemente. Aunke kizas bo no ta sinti cu bo tin sed... bebe awa of otro liquido!
