ORANJESTAD (AAN): Manera ta conoci, TUI cu ta e agencia di viahe grandi di Europa, a introduci e linea di producto ‘Fair Travel’ na luna di Maart di aña 2021. Esaki ta enfoca riba viahamento cu bista riba comunidad local y economia, estadia den hotelnan cu un etiketa ecologico y inverti den sistemanan di mobilizacion mas sostenible.
Cada pasahero cu cumpra un viahe di Fair Travel, ta contribui cu 2 Euro y TUI ta añadi 2 Euro. A logra recauda un montante grandi cu
e fondo aki e ultimo aña aki na Hulanda y Belgica. TUI lo inverti un parti substancial di e entrada aki den instalacion di stacion pa charge autonan electrico na Aruba, Bonaire, y Curaçao.
Esey ta debi cu TUI kier stimula viahamento mas sostenible. Esaki ta worde haci riba un escala grandi a base di e strategia di e compania di biahe mundial TUI Group y tambe cu iniciativanan concreto na destinacionnan di vacacion. Caribe ta un destinacion sumamente importante pa TUI, e organizacion di viahe ta transporta hopi pasahero. TUI ta desea pa turismo keda di balor agrega pa e islanan y comunidad local. No solamente pa loke ta e aspecto economico pa comerciantenan local y como e sector cu ta percura pa cuponan di trabao, sino tambe pa mantene esaki atractivo den futuro. Pa e motibo ta importante pa haci viahenan mas sostenible.
Na Hulanda esaki ta un topico diario di combersacion, pero na e islanan den Caribe esaki ta un topico cu ainda ta hala poco menos atencion. Pero, inverti den sostenibilidad ya caba ta un necesidad. Autonan electrico ta contribui na minimaliza expulsion di gasnan dañino. Na e momentonan aki tin relativamente poco auto electrico na islanan ABC. Un di e causantenan pa esaki ta cu no tin masha stacion pa charge auto riba e islanan.
Pa e motibo ey, TUI Hulanda y Belgica ta inverti den stacionnan di charge auto electrico na e destinacionnan bunita aki di islanan ABC. Den colaboracion cu e compania local Dynaf, lo instala no menos ku 55 stacion di charge auto electrico den e prome parti di e aña 2023, y Aruba lo haya 15 stacion di charge. Na Bonaire lo bin cu 10 stacion, y Curaçao lo haya 30 stacion.
Nan lo ta localiza na diferente lugar, tanto na Hotel, como na lugarnan usual manera supermarket. Tambe lo instala algun stacion di charge auto electrico, e asina yama ‘solar carport’ na lugarnan cu no ta asina comun cu tin coriente, por ehempel na beachnan cu ta leu situa.
Arjan Kers, kende ta Gerente General di TUI Hulanda aki a bisa: “Pa e turismo di futuro ta importante pa cuminsa inverti den iniciativanan cu ta apoya sostenibilidad for di awor. Ya caba tin proyectonan ta canando cu TUI Care Foundation, proyectonan manera procesamento di residuo di plastico hunto cu Green Phenix. Pero cu e inversion importante aki di instalacion di portalnan di charge autonan electrico, nos kier contribui directamente na un transporte mas berde. Nos a dal e prome paso, awor ta toca turno na Car Rentals y bendedornan di auto pa percura pa amplia e flota di autonan electrico.”
E siman aki na Curaçao, e proyecto a wordo lanza oficialmente den presencia di Ministronan di e isla ruman, unda a desmantela e prome stacion di charge auto electrico, y den forma simbolico a conecta e waya di charge na un auto electrico.
