Filipino di 56 aña di edad den emergencia medico...
ORANJESTAD (AAN): Tabata Diasabra merdia, cu Centro MOC (Centro Operacional Maritimo) di Wardacosta di Caribe Hulandes, a ricibi un yamada di un barco di carga pasando den Caribe, cu tin un emergencia medico abordo.
E momento ey e barco tabata pasando den region unda Wardacosta di Caribe Hulandes tin e responsabilidad di rescate.
Via VHF Marine Radio, a pasa e detaye cu un miembro masculino di tripulacion di nacionalidad Filipino, a sufri un emergencia medico y awor e no por ni cana. Pa colmo no tin dokter abordo di e barco di carga, y pesey a pidi auxilio y check si por yuda haci un evacuacion.
Manera protocol ta stipula, Centro MOC a contact e dokter di organizacion CITRO na Corsou, pa dune detaye di loke a socede. Mesora e dokter a indica cu e ta algo urgente, y tin di bay yuda evacua e tripulante y trece rapidamente pa e Hospital di mas cerca.
Barco ta 340 km leu di Aruba: Mesora Centro MOC a pone e helicopter di Wardacosta na alerta, pa nan lanta vuelo. E helicopter a lanta pa 2:26 pm for di Corsou y a bula pa Aruba unda el a ateriza pa 3:00 pm. No ta conoci si acaso na Aruba el a yena tanki cu jetfuel pasobra e ruta ta basta largo. E barco e momento ey tabata como 340 km Noordwest di Aruba.
Pa exactamente 3:34 pm e Helicopter a lanta for di Aeropuerto di Aruba, y asina a tuma direccion pa e barco. El a dura mas di 1 ora y 20 minuut bulando, y alrededor di 4:54 pm el a yega e barco.
Bulando riba e barco, a coordina cu e capitan pa keda nabega den direccion di biento, y helicopter a bula tambe mes duro, pa asina por keda ‘hover’ riba e barco. E operacion di rescate a dura como 10 minuut, y a logra hisa e pashent. Despues cu e pashent tabata abordo, cu a strap tur cos como debe ser, pa 5:04 pm e Helicopter a cuminza bula bek pa Aruba. despues a sali rumbo pa e Hospital di mas cerca, cu den e caso aki ta Dr. Horacio Oduber Hospital na Aruba. A dura 100 minuut pa nan a yega Aruba bek bulando un haltura di 6 mil pia.
Pa 6:25 pm e Helicopter a ateriza na Aeropuerto di Aruba. Aki un unidad di Ambulans tabata cla pa ricibi e pashent, y posteriormente a sali cu ne rumbo pa Hospital pa e ricibi tratamento medico.
