ATENAS: Un Fiscal na Grecia a presenta e siman aki, acusacionnan penal contra e Capitan di un Ferry,
y tres miembro di tripulacion pa e morto di un pasahero kende a “yega laat” na e Waf, y el a wordo benta den lama ora el a trata di subi e ferry na e puerto di Piraeus.
E suceso aki cu a wordo capta riba video, a provoca reaccion furioso na henter e pais. E imagennan a mustra e homber ta coriendo pa subi e rampa pa yega abordo di e Ferry di nomber ‘Blue Horizon’, cu ainda ta poni aunke ya nan a los e cabuyanan y tabata preparando pa bandona e Pier. Unavez el a yega na e plataforma cu ta sirbi como brug pa auto y hende subi e Ferry, el a kere cu el a yega na tempo. E plataforma ainda ta baha, pesey el a trata di forza su paso pa bay paden contra dos miembro di tripulacion cu tabata luchando cune.
Ora cu e tabata djis algun meter di drenta e barco, el a wordo wanta un biaha mas pa un empleado kende a pushe masha duro mes net ora cu e Ferry ta halando un banda y e plataforma ya no tin contacto mas cu e pier. E pasahero a cay net den e lama for di e plataforma, den e buraco forma entre e pier y e barco.
E tripulantenan djis no a ni haci nada pa salb’e, y e Ferry a djis sigui bay rumbo pa isla di Crete, prome cu el a haya ordo pa regresa Piraeus.
Guardacosta di Grecia a indica cu e homber a wordo saca di lama fo’i tino, y despues a constata su morto. Ordo a ser duna pa practica autopsia pa determina e causa exacto di su morto.
Attica Group, cu ta e compania doño di Blue Star Ferries, cu tin e Ferry Blue Horizon, a core manda un boletin pa bisa cu nan a keda “devasta pa e incidente tragico” aki, y a bisa cu nan ta bay coopera completo cu autoridadnan. Pero e capitan, e prome asistente, y dos tripulante mas di e Ferry tin di bay presenta dilanti un Fiscal di Piraeus.
