ORANJESTAD (AAN): Parlamentario mr.dr. Ryçond Santos do Nascimento, a duna un tributo na e recien fayeci, señora Digna Lacle-Herrera.
A bira moda na Aruba pa haci un distincion entre politica tradicional y politica moderno. Ta haci comosifuera e politica tradicional no tin contenido, no tin substancia y no ta transforma nos sociedad. E vision aki ta eroneo. E bida di señora Digna tabata un ehempel di un politica cu curashi, no solamente pa bay contra leynan y un sistema inhusto, pero tambe pa bisa locual bo ta pensa na bo compañeronan den politica. Na cierto momentonan señora Digna a laga tanto Henny como Mike sa bon cla kico e ta pensa. Awendia e tipo di curashi aki a bira schaars. Tin hopi ta papia tof y tin hopi cu ta bati riba nan pecho cu nan ta integro, pero tiki ta hiba un lucha di henter un bida pa conscientisa, informa y educa.
Mi nomber ta Ryçond Santos do Nascimento y mi tabata tin e privilegio di conoce señora Digna personalmente. Mi a cera conoci cu ne na cuminsamento di aña 2017, un tiki despues cu mi a haya e titulo academico di doctor den ley for di Universidad di Groningen y un par di luna despues tambe di Universidad di Aruba. Despues di mi promocion Esther y Ichelle a acerca mi cu e pregunta si mi kier a bira miembro di Fundacion pa Formacion Politico Digna Laclé-Herrera. Mi a acepta esaki, aunke despues e rector di Universidad di Aruba a pidi mi pa aleha di e fundacion y despues hasta a pidi Luciano Milliard pa pidi mi pa haci esaki…
Pero contratiempo pa motibo di bo conviccionnan no ta nobo y señora Digna a mustra hopi mas curashi y na un edad hopi mas jong cu mi. Na edad jong el a drenta enseñansa y poco despues a haya interes pa politica. Señora Digna a conta mi cu su famia tabata PPA. El a conta mi di doctor Da Costa Gomez y con e mes a cuminsa duna charla na grupo di hende pa conscientisa riba diferente topico, manera e derecho di hende muhe. Señora Digna a lanta den un epoca cu e hende homber tabata esun cu ta cera un hypotheek sin mester di e apropacion explicito di su casa; un tempo na unda hopi biaha un mucha muhe mester a stop su estudio pa yuda na cas cu su rumannan; un tempo cu ora un mucha muhe casa e ta perde su trabao automaticamente pasobra hende muhe mester a cuida e cas y e famia.
E mundo cu Digna a lanta aden tabata prohibi hende di papia Papiamento na school. Mucho menos tabata tin oportunidad pa desaroya Papiamento na un manera structura. Señora Digna a duna Papiamento su balor y a yuda desaroya nos lenga materno pa yuda cada un di nos expresa nos mes na un nivel mas halto, pa e simpel motibo cu nos por siña domina Papiamento.
Señora Digna a enfrenta e mundo ey cu curashi, mientras e mester a lucha cu un dolor personal grandi. Den e peregrinahe ey el a bira AVP. El a sostene Henny na un momento cu ningun hende tabata kere ni den Henny ni den e partido. Esey tambe ta curashi. El a mira y yuda e partido crece y a bira e prome lider di fraccion di AVP di parlamento di Aruba.
Pero no kere na ningun momento cu señora Digna tabata un AVP fanatico. Su loyalidad na e partido aunke firme, semper tabata condicional. Ora e tabata tin un critica, semper el a expresa esaki na Henny y despues tambe na Mike. Na varios ocasion el a taha mi di acepta cu partido ta bay un rumbo robez. Semper el a keda AVP pasobra el mira un partido cu ta keda esforza su mes pa renoba, pa siña di nos erornan y pa aspira na hiba Aruba dilanti. E tabata orguyoso cu e por a inculca den e partido e necesidad pa formacion di lidernan, no como un ehercicio di mercadeo, pero como un inversion den futuro di nos Pais. P’esey e fundacion cu ta carga su nomber por a contribui desde 2006 no solamente na formacion di politiconan di AVPy, pero tambe na politiconan di diferente otro partido. Cada curso cu nos a duna ta herencia di señora Digna.
P’esey ta nos deseo awe ta cu señora Digna por inspira bo pa bo tin e curashi, aunke esaki ta nifica cu bo por perde bo trabao, aunke esaki ta nifica cu hende lo insulta bo y yama bo pa tur sorto di cos. Curashi pa traha riba un legado cu no ta bo honor propio, sino un Aruba mas incluso, mas husto y mas miho.
Na honor di Digna…
