ORANJESTAD (AAN): Riba e website di U.S. Department of State por a constata diabierna atardi cu ainda tin restriccion di viahe pa Aruba.
Ora di bishita e website di CDC (Center for Disease Control and Prevention) di Merca, y bishita e parti di 'travel restrictions' por ripara cu e advise pa Aruba ta den cora (cual ta e nivel 4) y esey ta nifica no biaha pa Aruba (Do Not Travel) pa motibo di e condicionnan relaciona cu Covid-19.
E update a wordo haci riba dia diamars 8 di Juni 202.
Mirando e situacion actual di Covid-19 na Aruba y cu e casonan positivo te cu diabierna tabata unicamente 15 y cu 3 caso nobo, ta considera cu e nivel 4 aki ta uno cu no ta cuadra cu realidad.
Segun reaccion cu DIARIO a ricibi, a yega momento pa CDC revisa e cifranan di Aruba y elimina e nivel aki y cambie pa sikiera Nivel 1: cual ta e nivel blauw (Exercise normal precautions).
Aruba ta alcansando un nivel di vacunacion di mas di 65%, turismo ta recuperando di un manera optimista mientras cu e 'positivity rate' a baha te na practicamente 0%, segun cifranan di Departamento di Salud.
A yega ora pa duna Aruba un extra 'push' y cambia e restriccion aki pa uno normal na lugar di tin'e den un nivel extremo, locual sigur ta afecta e decision di viahe di hopi turista cu kier bishita e isla.
