Entrante 1 di februari 2026
ORANJESTAD (AAN): Entrante 1 di februari 2026 e contracto entre Organo Ehecutivo AZV (OE AZV) y dokter Johnny van der Linden ta finalisa. AZV ta gradici dokter Johnny van der Linden pa tur cuido cu el brinda nan aseguradonan. Y claro palabra di hopi exito pa cu su siguiente etapa den bida.
Na mes momento AZV ta yama bonbini na otro dokter di cas cu pa e gran mayoria no ta un cara desconoci. Ta trata aki di dokter di cas Maikel Kelly. Dokter Kelly pa hopi aña tabata tin su practica na Piedra Plat pero awor -entrante 1 di februari 2026- lo bay brinda servicio medico na tur pashent inscribi cerca dokter Johnny van der Linden.
Dr. Kelly ta ex-studiante di Colegio Arubano (VWO) y Rijks Universiteit Groningen (RUG) na unda el a haci e estudio di medicina general pa despues continua cu su specialisacion pa dokter di cas na Maastricht UMC+. Despues di su specialisacion el a obtene hopi experiencia trahando e.o. na Noord-Brabant (Hulanda) cerca diferente dokter di cas, huisartsenpost y den ramo di salud mental.
Traspaso automatico
OE AZV ta responsabel pa servicio medico continua y pa e motibo aki ta haci un traspaso automatico. Entrante 1 di februari 2026 tur asegurado registra cerca dr. J. van der Linden (Savaneta) ta pasa automaticamente pa dr. Maikel Kelly, Savaneta 82, telefon 5846427.
Esaki ta nifica cu e asegurado no tin nodi haci nada, tur cos ta keda regla digitalmente.
Con por wak e cambio?
Entrante 1 di februari 2026 e asegurado ta wak e traspaso automatico via e AZV app. Ta habri e AZV app cu bo codigo pin y drenta e bloke Menu →e Dunadonan di Cuido di …→ Dokter di cas →E dokter di cas di …
No ta di acuerdo
Solamente den caso cu bo no ta di acuerdo cu e traspaso automatico aki, e ora por cambia di dokter di cas (dentro di e capacidad cu tin disponibel) di bo propio interes. Tene cuenta cu e ora bo mes mester pidi pa un aprobacion di e dokter di cas (firma di dokter) cu abo ta desea. E dokter di cas y bo persona ta firma e formulario “Cambio di Dokter di Cas”. E dokter di cas mes of su assistente ta manda e formulario pa OE AZV. Despues por wak e cambio den e AZV App ora cu bay na: Menu→Dunado di cuido →E dunado di cuido di bo persona→Doctor di cas→Eynan bo ta wak e doctor di cas nobo.
Recomendacion
OE AZV ta recomenda tur asegurado pa download e AZV app y asina registra pa bo digi ZorgPas. Bo persona ta bay den Google Play Store of Apple Store pa download door di primi e boton “install”. Sigui e preguntanan pa registra pa bo digi ZorgPas. Den caso cu bo no ta logra, libremente por comunica cu nos pa haya ayudo via This email address is being protected from spambots. You need JavaScript enabled to view it. of por pasa personalmente na nos oficina situa na Rumbastraat 21 y AZV lo yuda bo pa instala e AZV app den bo celular.
