Minister Arends ta confirma:
ORANJESTAD (AAN) – Manera DIARIO a publica recientemente, Dialuna 31 di Juli awo, e tram ta cuminza core den Caya Grandi atrobe. Den un entrevista cu DIARIO, Minister di Transporte, Integridad, Naturaleza y Asunto di Adultonan Mayor, Ursell Arends, a confirma esaki.
E mandatario a bisa cu decision a wordo tuma, dia 1 di December 2022, conhuntamente cu Conseho di Minister, pa peticion di comerciantenan mes, estableci den Caya Betico Croes, pa duna oportunidad pa autonan por frecuenta den e centro di ciudad y pesey, pa cuater luna a stop e tram, y lague core solamente te Plaza Daniel Leo y Caya Betico Croes a keda uza solamente pa vehiculo.
Pero despues di un periodo di evaluacion e decision cu a wordo tuma y di sinta bek cu comercio, a resulta cu tin cierto lugarnan den Caya Betico Croes, cu nan modelo di negoshi ta depende completamente, di e operacion di e tram.
Despues di a sinta cu e comerciantenan cu ta mas na final di Caya Betico Croes, a tuma e decision cu lo pone e tram core di dialuna pa diabierna di 1 or pa 4:30 di atardi y di e forma aki e tram lo opera bek y e negoshinan cu ta depende turista crusero tambe lo beneficia di esaki.
“Nos ta kere cu esaki ta e decision logico, pero mester remarca si, cu na final di dia mester tene cuenta cu tin empleadonan cu ta traha na tramp cu mester garantiza nan trabao. Alavez, mi kier agrega cu no ta pasobra e tram a wordo introduci door di otro signature di gobernacion, esey automaticamente mi mester bay contra dje. Mi ta kere cu ta placa di pueblo (pagador di belasting) a paga pa esaki, y mi ta kere cu nos tin cu garantiza cu e tram ta opera na un forma cu e ta trece un balor agrega pa comercio den Caya Betico Croes, y esey ta loke nos a haci. Mi ta spera cu un bez cu e tram cuminza opera e comercio den centro di ciudad, cu ta depende di e tram, tambe lo por sinti e efecto positivo di esaki”, e dignatario a señala.
