Hose Figaroa Presidente di FTA:
- Poco-poco nan ta yegando edad di pensioen
- E suma di pensioen lo no yega pa nan sobrevivi
ORANJESTAD (AAN) Den entrevista cu Hose Figaroa, lider sindical di e Federacion di Trahadornan di Aruba (FTA), el a referi na e fondo di pensioen AOV relaciona cu e trahadornan importa, cu a bin traha na Aruba den e decada di 90, cu aki poco aña lo yega na edad di pensioen y por cay den un situacion di pobreza of ta obliga di sigui traha.
Figaroa a menciona cu durante henter aña pasa nan a traha conhuntamente cu Fundacion Plan di Bida, y FTA a duna diferente charla di trabao, y a haya cooperacion di diferente empresa den cual FTA tin afiliado, y entre otro nan a trata e tema di con pa maneha bo placa.
Problema pa maneha presupuesto domestico ta uno cu FTA ta mira aworaki, pero cu e lo bira peor den e añanan binidero, segun e lider sindical.
“Pakico? Pasobra durante e añanan 80, 90 Aruba a importa hopi trahado y e trahadornan aworaki, pocopoco ta yegando edad di pensioen. E problema ta cu a base di e ley di nos pensioen di behez, pa e cantidad di añanan cu bo ta biba na Aruba, ta determina con halto e pensioen di biehes cu bo ta haya ta bay ta”, Hose Figaroa a señala.
El a splica cu e grupo di trahadornan aki, no a biba na Aruba suficiente aña y no ta haya un pensioen completo.
“E ta un grupo di hende cu ta sigui crece pa añanan, y ta bay biba cu pensioen di biehes pa rond di 400 florin pa luna. Si tene cuenta cu e minimo di subsistencia ta den careda di 2500 florin pa luna, un diferencia enorme bo tin eynan pa luna. Banda di esey, na aña 2013 berdad a wordo introduci un pensioen general, pero esaki ta depende di e aña cu bo a start den dje, pa wak cuanto pensioen bo ta haya. Na final, e pensioen general eynan, si bo agrega esaki na e pensioen di biehes, cu ya ta reduci caba, bo no ta bay yega ni na mil florin pa luna pa e grupo aki”, Hose Figaroa, presidente di FTA a señala.
Esaki ta un problema cu mester cuminza deal cu ne, pasobra e ta bay bira mas grandi den e añanan cu ta na caminda. “Ta hende cu a cuminza traha na Aruba na cuminzamento di añanan 90, aworaki ta bayendo 35 aña trahando, pues pocopoco nan ta bay yega edad cu nan mester sali for di e mercado laboral, pues na edad di cuminza cobra pensioen, pero na momento cu nan no tin suficiente placa pa biba, cu nan no ta ricibi suficiente na pensioen pa por biba di esaki, ta bay tin un problema. Of nan ta bay keda traha, locual lo stagna e mercado laboral un poco, aunke awo nos tin necesidad di trahado, of di otro banda nan por cay den un situacion di pobreza”, Hose Figaroa a remarca.
