Anselmo Pontilius, Mediador di Gobierno:
ORANJESTAD (AAN) – DIARIO a entrevista señor Anselmo Pontilius, Mediador di Gobierno, tocante e tema di pensioen pa trahadornan di Airport Authority NV; y el a bisa cu nan gran aspiracion ta pa cay bao e Fondo di Pensioen di Gobierno, APFA y ningun otro.
Pontilius a duna di conoce cu prome el a reuni cu Sindicato STA y su abogado, y despues a reuni dos biaha cu Gerencia y dirigentenan di e sindicato mes.
Pontilius a menciona cu loke el a pone riba mesa ta nada menos cu un articulo di Ley di Pensioen cu a conoce cambionan bastante pisa e ultimo añanan, pero en todo caso, e ta un Landsverordening. Esta, un ley cu ta dicta kico ta pasa ora e persona tin pensioen.
Mediador Pontilius a agrega mester tene cuenta cu prome cu cumpli mes cu nan peticion di bay vota, e trahadornan mester wordo debidamente informa.
Den e caso aki, ta mas cu 200 trahador di Aeropuerto, y e punto aki a bin den discusion mas cu cinco aña pasa.
“Pa haci'e cortico, articulo 3.6 ta bisa cu na momento cu e contrato, cu bo tin cu bo dunador di trabao vence cu e compania cu ta administra e pensioen, bo tin e situacion cu e trahadornan cu finalmente mester bay disfruta di pensioen por bisa cu nan kier busca otro alternativanan, otro compania cu por administra nan fondo di pensioen, cu eventualmente por duna nan un miho resultado.
Den e dos reunionnan aki cu nos a pasa, nos a pidi e compania, den presencia di e dirigentenan di STA, laga nos papia cu un actuaries, cu ta e profesionalnan cu ta calcula pensioen y pa laga nan cuminza un proceso informativo na e trahadornan.
Pasobra, prome cu laga e trahadornan bay vota riba kico ta bay vota, nan por sa e contenido, splicacion, pro y contra, den kico bo ta bay haya bo cune”, Anselmo Pontilius a splica.
El a sigui bisa cu cada acuerdo cu e trahador firma pa esun cu ta bay administra e pensioen ta pa cinco aña. “Den e caso aki e dirigentenan sindical ta bisa cu nan no kier ripiti aworaki loke nan a pasa aden cinco aña pasa, pasobra nan ta sinti cu tabata tin un preferencia di e compania, den direccion di un compania so, y no otro opcionnan cu a wordo poni riba mesa”, Pontilius a relata.
Den e dos reunion un actuaries a bin y a splica e opcionnan cu tin riba mesa, y e parti mas importante cu a wordo acorda, ta cu e trahadornan, den sesionnan informativo, tur e companianan cu ta duna servicio di administracion di pensioen, lo bin brinda un splicacion na e trahadornan. Asina Mediador di Gobierno a señala.
