Investigacion di DIARIO durante Siman di Salud ta presenta realidad --- *Productor mas grandi di lesionnan destructivo pa calidad di bida --- *Prevencion di accidente den trafico ta alivia e gasto di Cuido Medico
ORANJESTAD (AAN) — Prevencion di salud ta uno di e armanan mas grandi cu hende tin pa defende su mes contra e proceso natural di bida.
E realidad aki a bini dilanti durante e Pandemia causa pa e Coronavirus nobo, cu prome cu hende por a haci uzo di un vacuna pa defende su mes contra e malesa, tabata e arma contra morto.
Durante e pandemia cu ainda no a termina, mas cu nunca a bini dilanti, cuanto arma natural hende tin contra condicionnan di salud cu tin efecto riba calidad di bida personal pero tambe riba comunidad.
Durante e siman cu a pasa, mundo a observa e Dia di Salud y a para keto riba pasonan cu ainda mester wordo tuma den sociedad pa confronta e menasa continuo di malesa y e peso cu e ta nifica pa hende.
E nivel halto di bida na Aruba, cu un base di educacion superior na hopi pais grandi, ta contribui na e hecho cu pa demasiado hende no ta visibel cu Aruba ta gosa di un nivel di Salud Publico cu no ta un garantia pa ciudadanonan di hopi pais na mundo.
E costo di cuido medico na Aruba pa cabez ta hopi halto pa sostene e exigencianan di cuido medico, cu ta sigui subi segun e nivel di Salud Publico ta avansa.
Ta e progreso di Cuido Medico tambe ta presenta na hende mas y mas forma pa for di nacemento por preveni malesanan cu ta un herment pa scapa bida y na mes momento preveni gastonan personal y nacional.
Malesa ta den caminda di salud di hende pero tambe accidentenan, cu ta sorprendente pero capaz di trece cambio imediato den bida di hende.
Cu accidente por provoca morto ta conoci, pero e resultado di un accidente riba calidad di bida di hende, te awor no ta haya suficiente atencion.
Tin hopi motibo cu un hende ta wordo lesiona durante un accidente, cu ta varia di un caida na un trapi te situacionnan serio cu por wordo provoca entre otro dor di peliger natural.
Informacionnan cu DIARIO a ricibi ta indica, cu e productor mas importante di lesion pa hende, ta trafico.
E hecho cu e casonan mortal sigur na un pais chikito ta keda limita, ta haci cu hende no ta mira trafico como uno di e causantenan mas grandi di destruccion di calidad di bida humano y gasto pa cuido medico di e pais.
Informantenan ta indica cu awor a e momento pa estudionan revela e diferencia den gasto pa problemanan medico ocasiona pa trafico durante e pandemia cu a conduci na “shelter in place” y toque de queda y e situacion normal sin medida cu ta afecta conducta diario di hende.
E problema di trafico como enemigo di salud di hende, no ta un problema di Aruba solamente pero di henter mundo y ta creciente, afectando comunidad riba tur tereno.
Lesionnan di trafico ta exigi actuacion di tur sector den cuido medico y den hopi caso tin resultado permanente pa hende riba tereno di salud, financiero, economico y social.
Un cantidad di factor ta contribui na e peligro di trafico pa hende. Falta di atencion pa un solo momento. Distraccion pero tambe consumo di alcohol y droga.
Informantenan a mustra, cu mester presenta publico realidad di e gastonan grandi riba tur tereno di cuido medico cu por ta necesario bida largo pero tambe e forma cu un persona di un momento pa otro mester deshaci di su calidad di bida y mester depende di otro hende pa resto di su bida.
Na 2022 Aruba a celebra Dia di Salud na momento cu e pais ta regresa na su normalidad cu ta nifica tambe cu e cantidad di turista ta aumenta, cu por bolbe na rutina cu tabata costumber y cu ta drenta e siman di Semana Santa, cu campamento conduciendo na celebracionnan di Pasco Grandi.
Den sector di Cuido Medico e necesidad di baha gasto ta presenta den un situacion financiero mundial dificil na momento cu mundo ta exigi mas cuido.
Segun informantenan Pueblo mester bira mas realistico enfrente e peligro di trafico pa salud y calidad di bida di hende.
E costo material y no material pa comunidad y ciudadanonan di accidente di trafico ta sumamente halto y lesionnan accidental mester haya bon atencion di publico pa hunto yega na e prevencion necesario, cu manera tur dirigente den Salud Publico ta indica, ta e forma mas importante pa por enfrenta malesa y lesionnan cu ta afecta calidad di bida di hende.
