Celebracion Dia di Trabou 2024 na Aruba ta marca historia laboral
- Economia liber y felicidad di hende tin un relacion directo
- Dia di trabou ta exigi na prome lugar e libertad pa scoge profesion
ORANJESTAD (AAN): Aruba ta celebra Dia di Obrero. Un dia grandi pa Aruba pasobra na 2024, obreronan na Aruba tin tanto oportunidad pa trabou, cu mester importa trahador.
A base di e sistema di Ley, e Gobierno Evelyn Wever-Croes pa medio di eleccion liber a haya e mandato pa crea un base economico pa Aruba, for di cual a nace oportunidadnan cu awe ta entrega e trahador Arubano, e oportunidad pa dicidi con e kier gana su pan di cada dia.
Dia di Obrero 2024 ta entrega Aruba un situacion economico y social, cu ta completamente diferente for di tanto pais grandi, cu hendenan kier bandona pa bin traha na Aruba, cu hasta mester a pone limite na su crecemento di economia debi na falta di trahador.
Esaki ta prueba cu na Aruba, e trahador por haci uzo di su derechonan mas sagrado pa dicidi con e kier traha pa haya su pan di cada dia y asina crece den posibilidadnan social y alcansa su felicidad, cu ta e base mas importante di democracia.
Resultadonan di eleccionnan liber rond mundo, ta papia un palabra cla. Rond mundo trahadornan ta lanta para y deshaci di e bril di palo di y ta lanta para pa e balornan di democracia real, di libertad.
Den e realidadnan di honor y problema humano, e mascara di comunismo ta basha abou y hende ta exigi pa e por alcansa su felicidad a base di libertad, cu ta cuminsa den e forma cu e por gana su pan y habri caminda pa su destino sin intervencion di gobierno dictatorial.
Dia di Obrero a wordo introduci na Aruba como parti di un pakete social total, cu ta basa riba e alma di democracia, cu ta hancra den e felicidad y libertad di hende pa crea e condicionnan di bida cu ta garantisa su felicidad.
Dia di Obrero pues ta e dia pa reflexiona riba e felicidad di hende, cu ta cuminsa cu libertad.
Un hende cu no ta capaz pa scoge y dicidi pa su libertad, hamas por ta feliz pasobra e mester somete su mes na loke su Gobierno ta ofrece, sin oportunidad pa habri su boca si e no kier haye den problema.
Un hende feliz ta biba na un pais, caminda e por dicidi pa medio di cual oficio e kier gana su pan di cada dia.
Den e pakete di felicidad di hende, “pan di cada dia”ta central. Un hende sin pan di cada dia, ta pasa den dolor grandi, mescos cu un hende cu ta wordo forsa pa gana su pan di cada segun decision di Gobierno.
Gana pan di cada dia pa medio di trabou, ta e regla cu Creador di hende a entrega na e prome hendenan cu no a tene nan mes na regla y haci cu te awe, hende mester gana su pan di cada dia cu sudor di su frenta.
Pero esaki no ta nifica cu hende no tin felicidad den e proceso aki. Hende a keda liber pa dicidi con e ta gana su pan di cada dia, na e forma cu e kier.
Na un pais democratico, esaki ta e esencia. Con labor ta haci hende feliz?
Aruba ta entrega e prueba cu e calidad di bida, cu ta atrae tanto trahador di exterior, di paisnan grandi incluso.
Pa tin felicidad pues mester di libertad, cu ta e palabra cu ta dicidi na cual momento por papia di un sistema di gobernacion cu ta entrega hende felicidad.
Aruba ta prepara pa observa Dia di Trabou, cu Gobierno Evelyn Wever-Croes cu Gobierno Evelyn Wever-Croes a duna un contenido nobo.
2024: Aruba ta skirbi historia cu e realidad cu tin tanto oportunidad di trabou, cu mester limita mas proyecto cu ta exigi pa importa trahador, cu pa medio di e leynan social di Aruba ta sostene e fondonan pa prepara y educa muchanan di Aruba pa un futuro liber, den cual nan lo ta e herment democratico pa maneha nan pais segun nan mihor talentonan.
Aruba ta skirbi historia pa e forma u el a adapta leynan pa sostene e personanan cu ta haya pensioen di behez, pero tambe por sigui traha como pensionado.
Aruba ta habri porta pa Arubianonan cu a bay traha den exterior, bolbe cas.
Gobierno Wever-Croes ta duna contenido na e concepto mas grandi di democracia, cu ta un Pueblo feliz cu por gana su pan di cada dia!
Dia di Obrero 2024. Un momento importante pa Aruba, caminda democracia ta haya contenido real!
