Atencion continuo y constistente:
ORANJESTAD (AAN): Diahuebs mainta Prome Minister mr. Mike Eman conhuntamente cu directora di FCCA Julie Wever y acompaña pa contrastistanan, tabata presente na Mabon Complex caminda a duna inicio na trabaonan grandi di renobacion y mantencion di e compleho di casnan social aki.
Premier Eman a indica cu un di e temanan cu tanto gobierno como FCCA ta poniendo hopi enfasis riba dje, ta e renobacion di e bario y casnan di pueblo. Un di e barionan cu a haya atencion inmediato ta e compleho na Mabon, cu ta den gran necesidad di mantencion.
Asina a comparti e grato noticia cu e trabao a inicia. Parti importante di e trabao ta inclui verfmento di henter e edificio, contruccion y trabao pa reenforsa e concreet entre e edificionan, sigura cu e structura ta cumpli cu e forsa fisico cu nan mester tin, como tambe cambio di entre otro e porta- y bentananan di cada vivienda.
Ademas Prome Minister Eman a comparti e noticia alentador pa diferente bario cu pronto lo mira renocabion y embeyecemento den nan bario, manera Bushiri y De Vuyst cu ta siguiente. Prome Minister Eman a gradici e team di FCCA y contratistanan cu tin e encargo aki den nan man.
Directora di FCCA Julie Wever tambe a expresa nan compromiso. E renobacion aki ta un muestra di kico FCCA hunto cu gobierno ta bezig cu ne. E bishitanan continuo den cada bario tin como meta pa renoba e barionan y di forma holistico trece e habitantenan hunto pa forma comunidadnan sano.
E varios ideanan pa cu e barionan aki a formalisa den un MOU pa asina traha den un forma mas estrecho na mehoracion di esakinan y pa brinda atencion maximo. Mantencion pa futuro tambe ta algo cu a trece dilanti den combersacion cu gobierno, pa e no keda na un mantencion incidental so, pero bira algo mas structural. Esaki ta un responsabilidad comparti y cu acuerdonan bon defini lo por logra hopi mas.
Pa Prome Minister Eman esaki sigur ta hopi bon noticia. Durante e bishita di tur diahuebs den barionan social por mira y scucha di e necesidadnan di e ciudadanonan cu den gran mayoria tin peticion pa cu mantencion di e viviendanan. Esnan mas vulnerabel den comunidad ta halto riba e lista di prioridad, pa e motibo ey tambe e atencion ta continuo y consistente pa logra.
Na Aruba tin un total di 45 bario di FCCA, cu cada un nan propio retonan y Gabinete AVP-Futuro tin e compromiso pa mehora e calidad di bida di cada ciudadano cu un acercamento diferente. Den pasado, mayoria bez tabata construi viviendanan cu e unico obhetivo pa fungi como luga pa biba pero no tabata inclui otro aspectonan cu hunto lo mester crea espacionan pa forma comunidad, no tabata inclui opcion pa bin hunto como bario y no tabata duna mucho perspectiva pa esnan den e barionan aki.
