Sharine Croes-Dubero, coordinador Arubalening:
- Tin 62 pa studia na Aruba y 237 pa studia na exterior
- Total di 186 studiante ta bayendo Hulanda e aña aki
ORANJESTAD (AAN) E preparacion pa studiantenan cu ta bayendo pa sigui estudio na Hulanda, ta bayendo bon. Asina señora Sharine Croes-Dubero, Coordinador Arubalening, a duna di conoce, den entrevista cu DIARIO.
El a cuminza pa bisa cu e aña aki, en total a haya 460 peticion pa Arubalening, tanto pa studia na Aruba como pa bay studia den exterior. Esaki ta nifica 86 peticion pa Aruba y 374 internacional.
Di e 86 peticion pa Aruba 62 a wordo aproba, y 237 internacional a wordo aproba. Pues un total di 399 studiante ta hayando Arubalening.
“Ainda tin cu ta cayendo afo, y p’esey nos ta keda stress si bo no ta bay mas, si no ta keda studia sea na Aruba y bay den exterior, pa por fabor comunica cu nos, y trek-in e formulario.
“Loke nos ta haci aworaki ta cu si e studiante no a entrega nada, nos mes ta trek-in, pero nos ta aprecia cu na momento cu bo no ta bayendo mes, ta nechi pa bo notifica cu bo no ta bayendo mas”, Sharine Croes a señala.
El a agrega cu 186 studiante ta bay Hulanda. E tabata mas di 220 y pico, pero a bira 186 debi cu mas di 60 a cay afo pa Hulanda pa motibo cu nan no a slaag, of algun di nan cu no a haya camber. Mayoria di e muchanan cu ta bayendo awo a haya camber. E aña aki nos a haya ayudo atrobe di FCC di Curacao. Nos ta gradici p’esey, cu nan a yuda nos pa nan haya camber na Den Haag, Amsterdam, Delft y Utrecht.
Di e 186 cu ta bayendo Hulanda, 86 ta bay riba nan mes. Di otro banda, Aruba tin un vuelo organiza, y 100 ta bayendo cu e vuelo organiza, te cu awo.
Sharine Croes a agrega cu ainda tin ta cayendo afo, pero no ta expect mucho mas pasobra e departamento ta purba di comunica cu tur cu tin riba nan lista. Tin diesun cu no ta biahando organiza, y falta 3 pa 4 ainda cu lo cay afo, debi cu nan no a haya camber.
“E aña aki a meld cerca nos 19 hende ‘free movers’ cu ta esnan cu no ta bayendo cu Arubalening, pero cu kier si ayudo di Arubahuis, pa nan por guia nan, y pa duna nan opvang pa yuda nan den e proceso di inscribi, y ora di handle nan asuntonan di camber cu yiu, etc., y esey nan ta bezig cu ne”, señora Croes a relata.
