ORANJESTAD (AAN): Hasta prome cu e Tormenta Tropical Franklin a cruza y pasa riba Republica Dominicana,
awaceronan torencial a cuminza inunda varios zona di e pais. Oficina Nacional di Meteorologia a hasta adverti, cu ora cu Franklin pasa mes, algun area kizas lo haya como 400 milimeter di awacero.
Compara esey cu e 25.7 milimeter cu di Dialuna mainta 8:00 am te cu Diamars mainta 8:00 am cu a cay na Piedra Plat na Aruba. Ey bo ta ripara mesora cu ta hopi yobida mes tabatin parti panort di e centro di e ciclon tropical aki.
Demas zonanan na Republica Dominicana lo bay ricibi entre 200 te cu 300 milimeter di awacero. Esaki sin papia mes di e biento cu lo bay azota e pais. Pasobra Tormenta Tropical Franklin tabatin un variacion den e intensidad di su bientonan, pasobra dado momento el a yega velocidad di 65 km/h sosteni cu rafaga mas fuerte.
E parti mas pisa a cuminza wordo sinti Diaranson mainta 8’or na Republica Dominicana, aunke ya caba por mira e potret aki di e awacero cu nan a cuminza haya un dia prome, esta Diamars. Toch Gobierno di e pais a pone henter Republica Dominicana den Alerta Cora, y siete provincia toch a keda den Alerta Geel.
