ORANJESTAD (AAN): Nubianan casi no tabata move mes riba Diabierna mainta y merdia.
Tabatin un calor hopi sofocante y dado momento a mira cu nubianan grandi tabata acercando. Particularmente a nota algo di zuid.
Sinembargo esun di zuid nunca a yega. Ta djis diripiente na parti noordwest di Aruba, un tormenta electrico a forma y bira exponencialmente grandi.
Na mesun momento un bentabal isola a forma na costa panort, den area di Natural Bridge y Andicuri. Pariba di Vader Piet y San Nicolas tambe un tormenta electrico a forma, y cuminza produci lamper y strena.
Algun area no a haya ni un druppel di awacero, mientras cu den distrito di Noord a yobe asina duro, cu hasta hende no por a ni sali di nan cas pa motibo di e yobida fuerte.
Na Playa ta djis un tiki awa a basha y nada mas.
Riba e imagen di radar aki, por mira con Aruba tabata cubri cu tormenta electrico cu tabata casi full riba Diabierna atardi.
