ORANJESTAD (AAN): Diaranson mainta, durante e conferencia di prensa di Gobierno hunto cu Crisis Team di Covid-19, e representante di Departamento di Salud,
Sharline Koolman a duna di conoce cu e proyeccionnan pa aworaki ta cu ta bay yega na un piek basta halto mundialmente.
Locual ta mira na Aruba, segun DVG, ainda no a yega na e totalidad. Ainda tin mas casonan cu lo sigui sali. El a bisa cu e variante Delta tabata 1.9 mas infeccioso compara cu e Covid-19 original. Aworaki Omicron compara cu Delta tambe ta mas o menos mesun cantidad, a remarca.
Si a haya un 500 caso di e virus original ta haya 1000 e ora di Delta y di Omicron ta haya 2000, Koolman a splica. Cada bes e ta duplica e cantidad di hende cu un hende por infecta cu ne.
Omicron ta causa menos daño y ta hayando menos hende den hospital, aunke na Corsow tin problema cu e opnames.
Por ta e caso cu e hospitalisacionnan mester bin ainda. "Nos ta spera cu nos por ta robes, pero nos ta pensa cu esey lo por sosode otro siman of aki dos siman".
Sharline Koolman a enfatisa cu e ta spera cu esaki no ta e caso, pero si ta mira loke ta pasando na Corsow, e por ta masha bon cu ainda e hospitalisacionnan por mester bin. A enfatisa cu e hospitalisacionnan ta sosodiendo mas tanto ainda entre esnan cu no a vacuna y/of no ta completamente vacuna.
Si antes tabata papia di un vacunacion completo cu ta consisti di un cu dos vacuna, tabata tin diferente discusion riba kico e 'booster' ta. Si ta dos of tres serie di vacuna, por ehempel. Esey ta den discusion, pero aworaki e indicacion ta cu e vacunacion di covid ta consisti (pa Pfizer cual ta uzando na Aruba) di tres vacuna, e representante di DVG a indica.
Si pa loke ta hospitalisacionnan kier evita esaki, mester e dos prome vacunanan y e 'booster', a declara.
