City Inspector Maikel Gomes:
ORANJESTAD (AAN)-- City Inspector Maikel Gomes, a comenta den entrevista cu DIARIO, cu Bureau City Inspector (BCI) ta ricibi hopi keho, di sushi cu ta wordo tira den terenonan priva. E ta haya e kehonan aki hopi alarmante y tambe lamentable, pasobra nan man ta mara, debi cu ta tereno priva.
“Sea ta tereno eigendom, tereno di vivienda, apartamento, etc. “Pero den e caso di sushi riba tereno priva ta keda pa e doño di e tereno”, Gomes a señala.
No obstante tambe, si ta trata di un tereno eigendom, esey no kiermen cu por tira sushi riba dje, haci un dump di dje.
El a referi na un caso na Noord unda hende sin escrupulo a tira sushi di tur sorto, incluyendo desperdicio di cuminda y e lugar a yena cu djaca y raton, afectando e bisiñanan di e lugar.
Gomes a bisa cu nan a bay check e caso aki. Normalmente nan no ta atende cu tereno priva, pero den e caso aki esun concerni a haci di mas, a traspasa e limite y yena e tereno cu auto, cuminda, y hopi otro sushi, haciendo daño na e vecindario. Bisiñanan a keha y City Inspector a haci e tereno limpi. El a splica cu e gastonan envolvi ta bay pa Bureau City Inspector, kiermen nan ta wordo kita di su presupuesto (Land Aruba).
Gomes a splica cu di 100 caso di e tipo di sushedad aki, 80% ta riba tereno priva y entre 20 pa 25% ta riba terenonan di gobierno.
“Prome cos cu nos ta haci como City Inspector, ta bay check ken ta e doño di e tereno, y intercede cu ne, prome. E prome instancia cu BCI ta deal cu ne ta polis di bario, pa bay investiga ken ta doño di e tereno y no logra consensus cu e doño, e ora ey ta pase pa BCI mes pa nos purba logra consenso cu e doño y no logra nos ta pase pa Departamento di Infrastructura y Planificacion (DIP). Al fin y al cabo DIP ta keda responsable pa tereno eigendom, erfpacht, huur, etc. En todo caso nan ta maneha mas facil y mas lihe e casonan aki, nan autoridad ta mas cu esun di nos”, señor Maikel Gomes, a duna di conoce.
