Den entrevista exclusivo
ORANJESTAD (AAN): E ta algo cu ta wordo discuti, y papia den forma cu bos hopi abao ultimo temponan. Pero awor si nan ta mira cu algo tin di wordo haci, y pesey a nota con doñonan di diferente Salon di Beyesa na Aruba ta saliendo dilanti.
Nan ta awor admiti cu casi nan tur, ta enfrentando un situacion hopi inhusto y preocupante. Specialmente nan cu ta empresarionan cu a haci sacrificionan financiero grandi pa trece empleadonan stranhero legalmente pa e isla. Esey nifica cu nan ta paga completo pa e permiso, ta paga belasting, tambe nan ta paga pa e pasashi, y hopi biaha hasta cas y lugar di keda.
Sin embargo, despues cu e permiso legal ta wordo entrega, hopi empleado ta bandona, y laga nan trabao original rapidamente pa nan mes cuminsa traha for di cas of informalmente, lagando e negoshinan cu a trece nan originalmente, keda sin personal y asina obligando e doñonan pa cuminsa tur e proceso di nobo pa busca trahador.
Loke ta mas preocupante ainda ta cu actualmente ta casi imposibel pa obtene permiso nobo pa Salonnan di Beyesa, mientras cu e empresarionan a sigui cu tur protocol, a cumpli cu tur obligacion legal, y toch na final nan ta esnan cu ta wordo mas afecta.
Na nan opinion, sigur Aruba lo mester introduci y formula algun forma di proteccion, compromiso y retencion pa doñonan di salon cu ta inverti, paga belasting, y mantene negoshinan funciona na forma legal na Aruba. No ta husto cu esnan cu ta sigui tur regla di ley, pero toch na final nan ta wordo pusha cu lomba contra muraya y keda perhudica, y keto bay trabao di competencia informal ta sigui crece sin e mesun responsabilidadnan ni gastonan.
DIARIO na fin di 2025 a hasta bay bishita cas di un ciudadano, kende a mustra cu ora e señora a entrega e cas di huur bek, el a bin descubri cu den e washok chikito patras di cas, el a konkel muraya, blafon, y instala extra tuberia pa asina el a crea un Salon di Beyesa den e pida chikito ey. E tabatin un negoshi ilegal den e cas ta peña cabey y haci make-up.
Den e kehonan nobo, tambe e doñonan ta expresa nan preocupacion grandi cu ta mira un falta di apoyo y orientacion eficiente for di DIMAS, loke ta haci e procesonan ainda mas dificil pa empresarionan cu kier traha legalmente.
Pesey e doñonan di Salon di Beyeza cu ta traha 100% legal ta pidi cu tur respet na Gobierno di Aruba pa revisa urgentemente e situacion aki, y tuma medidanan mas husto pa proteha e negoshinan legal cu ta crea empleo y contribui na desaroyo economico di e isla. Nan kier hasta sa, ta con lo bay haci cu situacionnan asina cu ta sigui ripiti cada luna na Aruba.
