Frans Ponson, Presidente di CUA:
ORANJESTAD (AAN) – E Presidente di e organizacion “Comerciantenan Uni di Aruba” (CUA), Frans Ponson, tin entendi cu tin reunionnan tocante e asunto di debit cards, y CUA mes lo tin un reunion pronto (e ta spera cu lo ta otro siman), cu Minister di Economia, riba e tema aki.
Segun Ponson, tin un preocupacion grandi den pueblo y enberdad hopi comerciante a cuminza cobra extra, si e consumidor ta uza su debit card pa paga.
El a menciona cu esaki ta algo cu ta proteha internacionalmente, y e ta reitera cu na Aruba hopi compania si e cliente pasa su debit card ta cobr’e extra.
Esaki ta algo cu mester atende cu ne, of kita e mashin y bisa e cliente “cash only”, locual tambe ta un preocupacion, y e tin entendi cu Gobierno ta riba e tema aki, pa wordo trata tambe.
Ponson ta kere cu mester bin un carchi local pa pueblo di Aruba. Esaki lo mester bay pasa cu mester bin un debit card mescos cu antes, cu no tabata e master card di awe. “Mester bin un debit card pa local unda cu e charge ta abao pa mitiga e fees riba e banco pa e prijs no bay subi”, Ponson a reitera.
El a agrega cu CUA no por papia pa tur comerciante. Comerciante ta subi prijs, hinca e fee aden pa tur cliente. “Nos ta bay haya problema tambe pasobra esun cu ta bay paga cash tambe ta bay haya subida di prijs, cu e no kier. “Awo tur comerciante ta warda pa wak kico ta bay pasa prome cu nan tuma accion. “Awo tin un par di comerciante ta cobra apart ora bo ta uza debit. Eigenlijk banconan ta bisa cu no mag, pero e ta un discusion entre banco, comercio y aworaki Gobierno mester cay aden pa tuma un decision, y mi ta kere ta Minister Wever mester bisa kico ta su vision, con e kier bay handle esaki”, Frans Ponson a comenta.
