Dr. Wilmer Salazar, Consehero Medico DVG:
ORANJESTAD (AAN) – Pa conclui e entrevista cu DIARIO, tocante e malesa Hepatitis Agudo Infantil, di origen desconoci, Docter Wilmer Salazar, Consehero Medico di DVG, a reitera cu e causanan di e malesa ainda no a wordo determina, pero a menciona posible factornan, kico ta e sintomanan cu mayornan mester ta atento si nan presenta y tuma contacto lihe cu docter. Medidanan di higiene ta keda e base di prevencion.
Kico nos sa di e origen di Hepatitis Agudo den Mucha di Causa No Conoci?
“ Hepatitis agudo of inflamacion di higra por wordo causa door di virus, bacteria, fungus, medicamentonan, yerbanan of kimiconan. Den e casonan cu a presenta actualmente, e causa ainda no a wordo determina. Loke si ta hala atencion ta cu:
1.- No a wordo isola e virus di Hepatitis A, B, C, D y E.
2.- No a haya asociacion cu vacuna COVID-19
3.-No a wordo identifica factornan di riesgo epidemiologico (p.e.viahenan internacional, etc).
4.- Posible relacion entre infeccion pa Adenovirus y Hepatitis agudo Infantil di origen desconoci ta den investigacion. Transmision di Adenovirus principalmente ta via aereo (tosamento, nistermento), boca-'faeces' of ta mishi cu obhetonan contamina cu despues ta hiba na boca o su mannan ta hiba na boca. Adenovirus ta un virus den mucha cu ta causa: dolor di garganta, diarea y/of sintomanan respiratorio (griep). Adenovirus a wordo detecta den un 50% di pashentnan cu Hepatitis agudo infantil di origen desconoci. Asina ta cu no ta sigur ainda cu Adenovirus ta e causa principal di e hepatitis agudo aki”.
5.- “Cientificonan ta investigando algun otro virusnan, toxina medio ambiental, medicamentonan, entre otro , cu lo por causa dañonan severo di higra den muchanan y cu lo por ta e causa di e sorto di malesa aki” Dr. Salazar a señala.
Riba kiko mayornan mester ta atento?
“E cuminzamento di sintomanan di hepatitis no ta especifico, kiermen den cualkier otro situacion di salud lo por ta presente: gana di saca, keintura, sacamento, dolor di barica, fatiga, no tin gana di come, dolor di jointnan. Despues di algun dia e mucha lo por presenta urina di color scur (cocacola), 'faeces' di color cla, cuero y wowo ta bira geel (ictericia).
Semper consulta na bo doctor pa ayudo medico si bo yiu ta cuminsa cu sintomanan no specifico y despues ta presenta urina color scur (cocacola), 'faeces' ta di color cla, cuero y wowo ta bira geel.
Doctor mester ta alerto si muchanan ta presenta sintomanan compatible cu hepatitis”, Salazar a splica.
Kico por haci pa preveni casonan di hepatitis?
“ E Hepatitis aki ainda no tin causa conoci, pa lo cual nos no por bisa cual medida precies mester tuma pa evita of preveni. Sin embargo, ta importante sigui medidanan di higiene manera: laba man frecuente, bon preparacion higienico di cuminda, higiene respiratorio, y si bo ta sinti malo, keda na cas. Si tin duda consulta bo doctor di cas”, Dr. Wilmer Salazar a conclui.
Fuentenan consulta:
Publicacionnan di: CDC, ECDC, PAHO, WHO, The Lancet Infectious Diseases, Corantnan internacional.
DIARIO ta gradici Dr. Salazar y DVG pa e informacion importante aki, cu sigur ta un aporte inmenso pa nos comunidad.
