Directora di DIMP, señora Luenne Gomez-Pieters:
- Anto ainda aña 2025 no a finaliza completo
ORANJESTAD (AAN): Yegando na final di aña 2025, Departamento di Impuesto (DIMP), a raporta te cu cuminsamento di luna di December, 945.3 miyon florin na entradanan di impuesto. Compara cu aña anterior, e ta 36 miyon florin mas, ta loke cu Directora di DIMP, señora Luenne Gomez-Pieters, a declara den un entrevista cu DIARIO a haci su persona.
Señora Gomez-Pieters a remarca cu e impulsornan grandi den entrada ta winstbelasting, dividendbelasting di aña 2024 cu ta wordo declara e aña aki, grondbelasting. Gomez-Pieters a enfatisa cu tambe ta registra entradanan di Airbnb segun cu DIMP ta verifica propiedadnan cu ta Airbnb, den caso cu nan no ta registra caba. Banda di esakinan, BBO, BAVP a trece entrada di 265.2 miyon florin. E ‘toeristenheffing’ tambe a trece entrada di 80.6 miyon florin.
Pa loke ta trata otro entradanan (Derden), manera erfpacht, Dimas retributies, AZV y SVb premies, tin un crecemento, specialmente riba nivel di SVb cu AZV cu a registra entradanan di 18.3 miyon florin y 15.6 miyon florin. ATA Sui Generis tambe a raporta 112 miyon florin na entrada pa ATA te cu October 2025.
Pa loke ta compliance, señora Gomez-Pieters a remarca cu tin un crecemento. Pa loonbelasting nos ta na 90% di compliance. Pa BBO, 87% di compliance. Toeristenheffing, 92% di compliance. Segun Gomez-Pieters, si bay bek na aña 2015, e compliance tawata alrededor di 63% pa 68%. Den esaki, el a agrega, digitalisacion di procesonan ta yuda contribuyentenan pa nan cumpli miho y na tempo.
“Entradanan ta cana manera mester ta manera cu nos a premira esaki. Tin un cambio den e Najaarsnota di 2025 caminda e ahustenan aki ta acapara. Nos ta hopi contento con e entradanan ta bayendo. Rond mundo e sistema di impuesto ta traha mescos, ora ta genera entrada, mester paga impuesto. DIMP kier pa e cumplimento ta na su luga. Y kico ta sosede cu e entradanan aki, ta keda na nos gobernantenan”, Directora di DIMP a duna di conoce.
