Astrid Britten, Directora di Biblioteca Nacional:
*Awe Biblioteca Nacional Aruba ta celebra su di 75 aniversario
ORANJESTAD (AAN): Den entrevista cu Directora di Biblioteca Nacional di Aruba, sra. Astrid Britten, el a duna di conoce cu na momento cu BNA a cumpli 50 aña na 1999 Dr. Wim Rutgers a publica e buki 'Nos Biblioteca ta di oro'. Eynan e autor a skirbi riba e 50 añanan di e institucion. Sigur un buki cu bale la pena pa lesa y aprecia y siña di su evolucion.
Sra. Britten mes, den cuadro di e celebracion di 75 aña di BNA a haci un recorido historico cual a prepara pa presenta awe diamars 20 di Augustus durante un mainta special pa e empleadonan di biblioteca.
COLECCION ARUBA
Mester remarca c'un di e proyectonan cu Biblioteca Nacional Aruba a lansa recientemente ta esun di www.coleccion.aw.
Dia 28 di september 2023 a lansa coleccion Aruba (www.coleccion.aw) uzando e plataforma di Internet Archive.
Coleccion Aruba ta un bunita ehempel di cooperacion di partnership cu a traha hunto. Tin tres fundador cu ta Biblioteca Nacional, Archivo Nacional y UNOCA. Aworaki e ta conta cu hopi mas partner manera Monumentenfonds, Telearuba, Monumentenbureau y pocopoco ta expande, a bisa. Tur ta uzando e plataforma di Internet Archive.
Pa enfatisa e importancia di lanzamento di Coleccion Aruba, di 8-12 di april 2024, Dutch Caribbean Digital Heritage Week a keda organisa door di Archivo Nacional Aruba, Biblioteca Nacional Aruba y UNOCA, esaki en conexion cu 30 aña di Archivo Nacional Aruba (1 di augustus 2024) y 75 aña di Biblioteca Nacional Aruba (20 di augustus 2024).
Durante e conferencia di ACURIL na mei ultimo cu a tuma luga na Georgetown, Guyana, Astrid Britten y Zetsia Ponson a presenta seventy-five year of library work in Aruba, an essential service 1949-2024, y den cuadro di nan proyecto di Sustainable Education Symposium Ronny Alders ta presenta e tema cu nan a presenta na april ultimo Let’s Plant y den cuadro di digitalisacion Peter Scholing y Raymond Hernandez a duna nan presentacion Linking the Dutch Caribbean Slavery Registers…and beyond y durante e clausura di e conferencia di ACURIL Peter Scholing ta ricibi e medaya di Caribbean Information Professional of the Year.
"Trabao di biblioteca constantemente ta evoluciona y expande. Cambio ta haci nos mas skerpi y tambe ta crea espacionan mas confortabel y funcional pa uzo di personal y di nos usuarionan", Astrid Britten a expresa.
BIBLIOTECA Y PAPIAMENTO
Britten a indica cu e aña escolar aki ta bay introduci Papiamento den Enseñansa Basico. Pero ta conoci cu mas lihe lo por haya riba internet tur e materialnan. Esaki kiermen cu buki atrobe ta bira algo hopi importante pa tin esey y pa duna e guia necesario unda cu por pa tin e publicacionnan aki.
"Mas y mas bo ta mira cu e ta importante den esey", a expresa.
Biblioteca mes ta un di e iniciadonan di Curso Nacional di Periodismo na aña 1996 pa 2000, curso cu Britten tambe a sigui for di interes propio. Asina mes el a participa den mas curso cu Biblioteca a organisa manera Finansas Publico - Leergang Openbare Financiën Aruba (LOFA) y tambe el a haci estudio di Corector di Papiamento pa Empleado Publico, cual no a haya seguimento.
Actualmente, algun di esnan cu a sigui e curso aki di Corector, a bin cu e iniciativa pa lanta e organisacion Corector di Papiamento cu aworaki ta esun cu a bin cu e curso di Dominio di Idioma cu ta tumando luga.
Esaki, segun Astrid Britten ta hopi importante pasobra "na Aruba nunca a duna les na scol den nos propio idioma y mi ta kere cu e foco ta importante".
CONECTA, COLABORA Y CREA
Biblioteca Nacional Aruba ta colabora cu otro organisacionnan y ta cas di Hunga Teca, Coder Dojo y Lieverd Lees Café. Ta 'founding partners' hunto cu Archivo Nacional Aruba y UNOCA pa cu coleccion Aruba. SETAR y Tele-Aruba, partners tambe, cu ta duna un tremendo aporte na trabao di biblioteca pa comunidad.
Astrid Britten: Nos tin un compromiso pa cu trabao di biblioteca "pa crea un biblioteca, community library, un centro dinamico pa studia, empodera nos sociedad unda mayoria di e poblacion tin suficiente habilidad di lesa y skirbi, promove studia pa bida largo, promove nos patrimonio cultural y duna participacion na henter comunidad”.
