Señor Jimmy Douglas di Aruba Ariba Tours:
ORANJESTAD (AAN): Segun señor Jimmy Douglas di Aruba Ariba Tours, tin solucionnan concreto cu por yuda crea un balance entre proteccion di naturalesa y e actividad di companianan di tour na Aruba.
Douglas a menciona cu ya na 2019 a entrega un mapa cu recomendacionnan relaciona cu uzo di e camindanan. Entre e propuestanan tabatin pa limita cierto ruta y crea dos via di aproximadamente tres meter cada banda, den un forma cu vehiculonan no por draai libremente pero solamente por sigui den direccion di entrada y salida.
Segun Douglas, e proposicionnan no a wordo implementa ainda y ta necesario pa autoridadnan y e diferente partidonan envolvi tuma un decision.
E representante di Aruba Ariba Tours a indica cu nan lo bay delibera cu tur miembro di e fundacion, mientras nan ta duna Fraccion di AVP, cu kende nan a sinta den un reunion recien, e beneficio di duda pa mira ki accionnan lo sigui despues di e reunion reciente.
Douglas a enfatisa cu e sector no kier confrontacion, pero cu tampoco por sigui spera indefinidamente mientras e camindanan ta keda cera y e impacto economico ta sigui aumenta.
El a indica cu, dependiendo di e desaroyonan den e siguiente simannan y e resultado di un caso cu ta pendiente, por considera diferente siguiente stap, incluyendo accion legal of mobilisacion di e sector den rutanan na Aruba.
“Si den un pa dos siman nos no scucha nada, y nos no haya un contesta cu ta den balance entre naturalesa y comercio, lo tuma e siguiente stapnan dependiendo e vonis di e caso cu lo bin dilanti aki dos siman. Pero mas pasivo cu actual, nos lo no bira,” señor Douglas a enfatisa.
Douglas ta sostene cu e meta principal no ta pa pone comercio contra naturalesa, sino pa crea un sistema cu ta permiti actividad economico responsabel mientras ta proteha e ambiente natural di Aruba.
