Francis Saladin di CUA: situacion di flete ta un situacion hopi preocupante
ORANJESTAD (AAN): Francis Saladin, den su posicion di representante di Comerciantenan Uni di Aruba (CUA) a trece dilanti su punto di bista diabierna mainta durante un conferencia na Camara di Comercio unda a elabora riba e situacion di prijs di transporte internacional cu ta afectando e prijs di hopi producto na Aruba tambe.
El a bisa cu pa e motibo aki KvK, ATIA y CUA a dicidi di acerca otro como organisacionnan ya cu nan tur ta comparti e preocupacion y nan ta mira tambe e reaccion den media, pueblo cu ta papiando riba e situacion di prijs.
E situacion di flete, a señala, ta un situacion hopi preocupante pasobra ta algo cu ta bay ta duradero. Ta premira hasta cu e prijsnan ta bay subi mas. Tin diferente circunstancia cu ta afecta prijs y Covid a trece un impacto di maneho di producto y parts cu no por funciona debidamente.
Na Aruba ta wak cu productonan cu ta wordo treci di Merca manera aroz, ta wak cu un container cu tabata bal anteriormente 3 mil dollar awor ta bal 5 mil y pico dollar, locual ta 40% mas caro.
Esaki ta haci un impacto directamente riba e prijsnan di e producto. Pero no solamente esey, e prijs di e producto mes tambe ta subiendo door cu tin un demanda asina grandi, a remarca.
Na momento cu Covid a presenta, e consumidor a cambia su patronchi di consumo unda cu door di come menos den restaurant, nan ta consumi mas for di supermercado. E demanda a bira asina grandi pa productonan di supermercado cu mundialmente e fabricanan no por cu e demanda ey. Pesey prijsnan ta bira asina halto, Saladin a indica.
Tin prijsnan halto combina cu flete halto cu ta causa un impacto inmensamente grandi, a splica.
