Parlamentario Gino Goeloe, fraccion Futuro:
- Tambe lo follow e tema di remedi paga pa nos grandinan
ORANJESTAD (AAN): Parlamentario Gino Goeloe, di fraccion FUTURO, den entrevista cu DIARIO a bisa cu cifranan ta mustra cu 87% di nos comunidad tin sobrepeso y obesidad.
Den pasado a bin cu plannan pa scolnan saludabel, cu actualmente tin diesdos na Aruba, y tin plannan pa amplia esaki, pasobra 12 scol saludabel di e mas di 80 scol cu tin y tur mester bira scol saludabel, desde kleuterschool te scol secundario y scolnan special.
Scol saludabel no ta limita na e snacks cu ta wordo bendi na scolnan, sino cu e ta inclui e aspecto social y e parti di seguridad tambe.
Goeloe a comenta cu den su funcion anterior e semper a boga pa hinca mas placa den prevencion di malesa, y e ta haya cu Departamento di Salud Publico mester haya mas recurso financiero di loke tin awo, pa bin cu mas prevencion riba bida saludabel (estilo di bida), haci mas propaganda den television, y radio, motiva hende pa cana, etc.
“Mi ta contento si, cu tin diferente compania caba cu ta motiva nan empleadonan pa cana, mi ta menciona Meta Corp., cu ta un di nan grandi cu ta hacie no solamente pa su empleadonan, pero tambe pa comunidad di Aruba, tambe Aruba Bank ta pone cuater dia di caminata cu ta un comienzo pa pone aruba move. Y esey ta algo cu nos, como gobierno, sigur ta sostene pa nos comunidad sigui move y biba un bida saludabel”, Goeloe a señala.
El a agrega cu e kier sigui riba e parti di remedi pa nos grandinan, unda cu actualmente nos grandinan, nos pensionadonan ta pagando remedi, nan mester haya esaki bek paga pa AZV, manera tabata antes.
“E ta algo tambe cu nos a pone den nos plan cu nos ta bay sinta cu AZV p’esey bira un realidad. Mi a tende cu e decision a bin pa 1 April awo, pero den e caso aki nada no a pasa ainda, anto nos tin cu follow up cu nos gobierno, pa nos pensionadonan haya nan remedi bek. Nos sa cu tin hopi grandi cu ta bay busca nan remedi y ora nan wak cu mester paga nan ta lag'e riba e shelf, y esaki no ta bon pasobra si bo no tuma bo remedi, por tin consecuencia cu bo malesa cronico por empeora y hasta bay hospital. Den e caso aki nos tin cu wak esey!” Parlamentario Goeloe a acentua.
