Luis Chong di GKMB
ORANJESTAD (AAN): Luis Chong, Hefe na Departamento di Gele Koorts Muskieten Bestrijding (GKMB) a confirma cu door di e awaseronan cu a cay recien, Aruba tin hopi sangura.
El a indica cu Aruba a haya hopi awasero y ta awaseronan cu ta cay dia tras dia. Esey ta pone cu ta hayando hopi molester di sangura. Esaki ta bin mas tanto door di casnan cu tin hopi sushi of hendenan cu ta coy awa rond di nan cas.
Tin un molester grandi di sangura den casi tur bario na Aruba. No por bisa cu ta un caminda so, pero tur caminda, a remarca.
Chong a sigui splica cu hopi hende riba e rednan social ta reclama cu tin hopi sangura y cu mester spuit. Pesey el a pidi encarecidamente pa e personanan aki contact GKMB pa asina por bay purba soluciona e problema.
El a indica cu spuitmento den principio no ta soluciona e problema. E problema di e sangura ta e criaderonan cu tin rond di e casnan di hende. Si GKMB ta spuit un dia pa su maňan e criaderonan ta produci sangura atrobe y den dos dia tin e mesun problema atrobe.
E combatimento di e problema di sangura ta cuminsa na cas. Pesey ta importante pa tene rond di e cura limpi y wak unda tin awa para y esey ta e gran ayudo cu mester, Luis Chong a expresa.
