Segun Francis Quandt Hefe Departamento di Keur:
ORANJESTAD (AAN: Den Landsbesluit Voorschriften Voertuigen, articulo 3 lid 3.e, ta para cu no ta permiti pa tin nada riba un vehiculo, ni banda di e chauffeur, ni banda di e pasahero. Tampoco riba e windshield. Esaki ta un ley existente contrario na loke cu hopi hende ta kere, segun señor Francis Quandt, Hefe di Departamento di Keur, a enfatisa den un entrevista recien cu DIARIO. Tur ciudadano por subi riba website di Gobierno pa comproba esaki y tur otro ley cu ta pertenece na trafico.
Por lo tanto, señor Quandt ta remarca, ta iligal pa tint na e partinan aki di vehiculonan manera ley ta prescribi enfatisando cu e ley ta vigente no solamente pa bay keur auto, sino na tur momento cu e vehiculo ta forma parti di trafico. El a remarca cu DTI no ta esun cu ta permiti ciudadanonan core cu auto getint scur, pasobra nan no tin e autoridad pa controla den trafico.
Sinembargo señor Quant a menciona cu riba e ley a añadi un regulacion tocante tint cu DTI ta manehando y cu ta den discusionnan cu e comision di trafico sigur pa implementa esaki full den ley. DTI ta midi e bentananan na banda. Riba 30%, e ta wordo goedgekeurd. Y bou di esey, e ta wordo afgekeurd. Y e windschield por tin solamente un strook di 15 cm ariba.
Segun señor Quandt, 30% ta duna mas visibilidad pa wak paden di e auto, no solamente pa ora polis controla sino pa siguridad di trafico en general. Anochi, si e auto ta full getint, no tin visibilidad di otro vehiculo riba caminda.
Tocante autonan cu ta bin di afo getint scur caba, señor Quandt a splica cu segun acuerdonan standarisa mundialmente, autonan no mester wordo fabrica cu glasnan getint pafo di e acuerdonan aki y cu nan ta sigui e mesun reglanan segun ley, y lo keur af autonan cu no ta cumpli cu esaki. Den casonan cu autonan ta wordo afgekeurd door di incumplimento na regla di tint, mester bay kita tint prome y bay bek DTI pa wordo gekeur. El a menciona cu esaki ta algo cu ta pasa hopi mes y a agrega cu pa dia ta keur af por lo menos 15 vehiculo door di no cumpli cu ley di tint auto.
