Meverly Romano, PR di DIMP:
*Si ta e caso DIMP no por registr'e na nomber di doño nobo
ORANJESTAD(AAN) — Meverly Romano, Relacionista Publico di Departamento di Impuesto (DIMP), a sigui splica den entrevista cu DIARIO tocante loke por sosode ora un persona cumpra un auto di segunda mano door di un doño mes, y esaki ta bay for di Aruba sin cu a paga belasting di e auto.
El a referi na ora e persona a cumpra un auto y e bendedor a bay for di Aruba. Hopi biaha DIMP ta tende e cumprador bisa cu e no tin contacto cu e persona di ken el a cumpra e auto, y DIMP no por bay registra un auto si tin un debe habri.
“Kico ta pasa? Sea cu e bendedor toch ta paga e debe, of e doño nobo ta paga e debe p’asina e por haya e auto registra riba su nomber. Pero toch ta un frustracion pasobra e doño nobo ta bisa cu esey no ta su debe, y e tin razon; pero e t’asina. Hopi biaha hende ta rabia cu nos, ta bisa cu DIMP no kier coopera pa nan por registra e auto, pero nos ta un instancia cu tin cu ehecuta ley. ‘E articulo di ley, ta e articulo 25 di belasting di vehiculo di motor, cu ta bisa cu ora cu e belasting ta paga por pasa e plachi na nomber di e doño nobo’. Y, ta pesey nos ta haya tur e hechonan den practica, pasobra nos no por registra, ni desconecta un number di e doño bieu pone riba nomber di e doño nobo, si e belasting no ta paga completamente.
P’esey atrobe un alerta na comunidad. Pa tur esnan cu tin pensa di cumpra un auto di segunda mano na Aruba, importante ta pa wak e condicion di e auto, pero tambe ta importante pa pidi e prueba di e registro di e auto, pa wak si berdaderamente e persona cu ta bendiendo esaki ta e doño di e auto, y pidie e recibo di pago pa wak si berdad el a paga su belasting te cu aña 2024”, PR di DIMP a reitera.
Si esey no ta e caso y e no kier coopera, kiermen cu algo tin, señora Romano ta acentua. “Pa despues bo cumpra e auto bo bin na DIMP pa haya e noticia cu e auto no por wordo registra na bo nomber”, el a enfatiza.
