Presidente di Parlamento, señor Marlon Sneek
ORANJESTAD (AAN): Presidente di Parlamento, señor Marlon Sneek recien a expresa cu desde maart pa awo basta cambio a ser haci. Parlamentario Sneek a wordo re-eligi como Presidente di Parlamento 2025-2026 y lo continua cu trabounan como Parlamentario y presidente.
Un cambio cu a tuma luga ta e premio anual di Parlamento, Hala di Shoco, cu a inicia e aña aki. E hoben Richard Tromp tawata e prome hoben cu a gana e reconocimento aki como hoben ehemplar cu ta haci cosnan pa nos comunidad, y a demostra cu e ta den e bida den e mundo di duna bek y comparti cu su prohimo.
Presidente di Parlamento a duna di conoce cu den e aña Parlamentario aki lo tin diferente reunion publico cu lo tuma luga proximamente, entre otro di presupuesto y rijkswet. Tambe Parlamento ta sperando pa haya cuentanan anual 2023 y 2024 cu ta esunnan cu ainda falta.
Señor Sneek a remarca cu den e Presupuesto 2026 por mira e direccion cu lo bay tin prosperidad comparti entre otro tin fondo aloca pa pensionadonan haya un otro 250 florin cu ta yega na e total di 500 florin. Muchanan special tambe lo haya sosten di onderstand, cu pa awo ta te ora nan bira adulto ta haya onderstand. E idea ta pa mayornan haya e sosten aki desde momento di nacemento cu e mucha ser diagnostica.
Un otro cambio den Parlamento ta tambe e minimum uurloon cua ley a pasa caba den Parlamento. Esaki lo duna un impulso riba salario di esnan cu ta cobra salario minimo.
“Tin diferente movicion cu ta bay debati riba nan den tratamento di Presupuesto 2026 pronto pa asina e parti cu tin un grupo den nos comunidad cu no ta probechando y disfrutando di progreso y bonanza si nos kier yam’e asina, cu pais tin, pa esaki por yega tambe na e ciudadanonan aki, Presidente di Parlamento, señor Marlon Sneek a expresa.
