Minister Croes relaciona cu investigacion FASE:
ORANJESTAD (AAN): Segun Minister Glenbert Croes, durante su rueda di prensa diaranson mainta, el e referi na e casonan specifico unda por a constata cu e otorgamento di FASE no a bay corecto.
Na prome lugar el a laga sa cu si mester cuantifica tur e procesonan cu mester a atende cu ne di solicitudnan di prome biaha ademas di e prolongacionnan ta papiando di 83.740 caso-dossier cu mester a wordo atendi di un programa cu no tabata existi na ningun parti na mundo.
Croes a indica cu el a haci un peticion na Parlamento pa no divulga ningun caso di ciudadanonan cu ta den investigacion. Riba peticion di Gobierno, CAD a haci un control pa wak unda tabata tin bon of mal uzo di e sistema y con gobierno ta atendiendo cu e programa en bista cu FASE no tabata existi ningun caminda.
E mandatario a duna di conoce cu 35 persona a ricibi dobel pago di FASE, y ora cu a detecta e pago dobel aki tabata pasobra e dos programa, di FASE y di subsidio a topa cu otro.
Inmediatamente, den control cu SVb, a atende cu esaki, a bisa. Den e caso aki a para FASE of Loonsubsidie.
E personanan cu a ricibi FASE y bijstand ta 49 persona y ora cu a detecta esaki tuma accion y sea nan bijstand (450 florin) a wordo para pa asina cu nan por a cuminsa cobra bijstand bek, check e placa cu nan a haya por a wordo uza, a bisa.
Hendenan cu a cobra pension y FASE. Gobierno a dicidi cu apesar cu e persona tin su pension, y cu nan ta traha ainda un otro caminda, pero cu nan a perde nan trabao, cu nan ta bin na remarca pa haya FASE.
Pa loke ta e personanan cu a fayece, Minister Croes a señala cu aki ta trata di dos persona cu ora cu nan a aplica tabata na bida y un di nan wardando pa FASE a fayece. E mandatario a bisa cu esaki ta un tema delicado pa atende teniendo cuenta cu e situacion di e famianan cu e persona ta laga atras.
Banda di esaki, a agrega cu tin 29 persona cu ta riba 'overgeheidpayroll'. CAD a señala den nan investigacion 29 persona cu ta riba payroll di gobierno cu a haya FASE.
A pidi CAD pa haci un investigacion mas amplio. A resulta cu na 2020 tabata tin 20 hende y na 2021 tabata tin 39 hende.
Tambe tabata tin e hendenan cu ta traha pa Land Aruba cu ta 'invalster' den diferente caminda of cu nan tin un contract, sea pa haci limpi, traha den Censo, haci limpi cant' caminda. Nan tin un relacion cu Land Aruba, Croes a expresa.
El a bisa cu tur caso cu a wordo señala y detecta, inmediatamente a tuma contacto cu e instancianan concerni pa tuma pasonan.
Pesey e ta condena e violacion di confidencialidad ya cu el a pidi esaki den Parlamento. Tin bista riba dos parlamentario cu ta kere cu ta esunnan cu a saca e informacionnan priva aki. Con ta bay wordo atende cu e parlamentarionan aki, cu a viola ley di privacidad di e ciudadanonan, cu ta aparece cu lo a haci mal uzo di e programa di FASE.
