Magaly Brito, Secretario General di SEPPA:
*Nan no ta bay acepta mas e storia “cu no tin placa”
ORANJESTAD (AAN) Señora Magaly Brito, Secretario General di Sindicato di Empleadonan Publico y Priva (SEPPA), den entrevista cu DIARIO a elabora tocante e paro di labor na Arubus, relaciona cu structura di nan salario, dialuna mainta, y e hecho cu e empleadonan no ta bay acepta mas e storia cu no tin placa.
Magaly Brito a expresa cu enberdad SEPPA tin hopi aña cu e lucha aki, y aunke a avanza un poco den e contexto aki, aña pasa nan a cuminza cu e discusion riba e structura salarial, unda cu prome cu e minister anterior a baha di su cargo, el a indica na SEPPA y tambe na Arubus cu e proposicionnan cu tabata tin riba mesa, e por a bay di acuerdo cu ne, y cu, como e unico shareholder lo bay pone placa disponibel den presupuesto, y esaki SEPPA a keda warda.
“Nos tur sa e situacion y circumstancianan aña pasa, unda cu na e momento ey gobierno a bay cas y mester a warda e gobierno nobo sinta pa nos por sigui riba e tema aki, y pa mustra gobierno cu e ta su responsabilidad e ora eynan pa pone placa disponibel, pa tanto SEPPA como Arubus yega na un acuerdo final”, Magaly Brito a indica.
Kico ta pasa ta cu ultimamente SEPPA a haci diferente intento cu e minister actual, pa e suma bira disponibel, y ta wordo bisa y reitera cu no tin placa y cu e surplus ta historia.
“Pero nos sa caba cu politiconan ta gusta hunta e rol akinan, y siman pasa cu tabata tin e tratamento, bo ta bin tende cu e mesun minister di Finanzas ta indica riba e surplus cu tin, y despues bo ta tende e gobernantenan ta grita cu esaki ta danki na esfuerzo di e trahadornan, entrega di e pueblo, etc. Y e trahadornan di Arubus tambe a forma parti di e entreganan di placa cu a wordo kita for di nan salario y nan no por sigui acepta cu cada bez cu ta keda aden cu e storia cu no tin placa”, Brito a señala.
