ORANJESTAD (AAN) – Rhomyco Winklaar, director di Fundacion Tienda di Educacion, hunto cu su colega Nicole Kock, a duna un conferencia di prensa relaciona cu e di diez aniversario di TdE.
Nan a presenta tambe e plannan cu e Fundacion aki tin, pa e lunanan siguiente, y durante e simannan venidero nan lo publica un serie di videonan.
Winklaar a splica: “Fundacion Tienda di Educacion ta cumpli, riba dia 18 di Mei 2022, exactamente diez aña di existencia. Diez aña pasa, despues di a haci un sondeo tocante riba prevencion di abuso di mucha, a surgi e idea pa lanta un bureau, un linea di telefon, unda cu mayornan por yama pa asina haya un guia y sosten ora ta trata lantamento di mucha, vooral ora tin preguntanan ta surgi ora un mucha no ta comporta su mes bon”.
Na cuminzamento Tienda di Educacion a conta cu subsidio di CEDE-Aruba, locual nan ta gradici hopi, pero na momento cu a ripara cu nan por a lanta un organizacion, esaki a wordo funda oficialmente riba dia 18 di Mei, 2012. E ora ey tambe Tienda di Educacion a drenta den su derecho di existencia, y desde e tempo ey caba a ripara cu tabata tin un tendencia cu mayornan ta acudi cerca nan, locual e fundacion ta haya cu ta hopi bon.
“Pesey nos tey tambe. Pa brinda e servicio gratuito tambe na mayornan. Ora mayornan yama 161, por ehemplo, esaki ta anonimo. Asina tambe, desde nos inicio y te awo nos a duna un total di 350 tayer na comunidad di Aruba, durante tur e añanan”, señor Rhomyko Winklaar a declara.
El a menciona tambe cu nan a duna consulta den mas di tres mil ocasion, sea via telefon of cu mayornan ta acudi na Fundacion, of cu nan ta participa den e tayernan di trabao, cu nan ta duna un consulta cortico.
“Tambe nos ta colabora cu diferente organizacion, den e ramo social, por ehemplo Fundacion Telefon pa Hubentud, Fundacion Respeta Mi, Fundacion pa Nos Muchanan, Wit Gele Kruis, FADA, DAS, Directie Voogdijraad, Bureau Sostene Mi, Fundacion Guia Mi, ADRA, Universidad di Aruba, pa menciona algun”, Winklaar a indica.
Ademas, y muy specialmente CHF (Centro pa Hoben y Famia) na unda Tienda di Educacion ta ubica, desde dos aña pasa. Señor Winklaar a reitera palabranan di danki pa CEDE Aruba, cu a colabora inmensamente cu e proyecto desde su inicio.
