ORANJESTAD (AAN) – Director di Fundacion Tienda di Educacion, Rhomyko Winklaar, a menciona den e conferencia di prensa,
relaciona cu e di diez aniversario di e Fundacion, cu nan no kier laga e fecha aki bay sin mas, y pesey nan a bin ta preparando desde aña pasa, pa celebra esaki e proximo Diaranzon, 18 di Mei.
Winklaar a duna di con e cu nan tin un serie di 29 video, pa asina nan por brinda e comunidad di Aruba tur informacion, pa locual ta trata lantamento di mucha. Kizas, personanan tin pregunta con nan tin cu haci den cierto aspectonan, of cu cambionan; kico ta e rol eigenlijk di hende homber como tata, of ora e ta ausente. Esaki comunidad por mira via e facebook page di Fundacion Tienda di Educacion, click riba e link, y ta obtenible via YouTube.
Diadomingo awo, dia 15 di Mei, Fundacion Tienda di Educacion lo ta den Centro di Bario Playa Pabao pa conmemora e Dia Internacional di Famia, unda nan ta bay tin un 'booth' y ademas nan ta bay duna un tayer, tocante con mayor por relaciona cu su yiu miho, y nan ta bay start cu esey henter e siman di 16 te dia 20 di Mei y den e siman di aniversario e Fundacion lo tin diferente entrevista cu medionan social, sea television, radio, y diferente otro entrevista cu lo bay tuma lugar.
Winklaar ta invita henter pueblo di Aruba, y specialmente e habitantenan di Playa Pabao y vecindario, pa bishita e evento aki riba Dia Internacional di Famia. E ta bay ta un feria unda ta bay tin actividadnan pa mucha y tayer pa mayornan simultaneamente.
Tienda di Educacion ta un organizacion chikito, cu ta consisti di e director Rhomyko Winklaar y su coleganan Nichole Kock y Noemi Haddocks, na kendenan tambe e ta gradici cu nan ta trahadornan hopi esencial den e organizacion. Tambe el a gradici e directiva di e Fundacion cu ta consisti di cinco miembro boluntario, en total.
El a gradici prensa tambe cu for di inicio ta yuda Fundacion Tienda di Educacion, pa su nomber keda resona den nos comunidad. Ademas el a gradici tur colaborado den e area social, specialmente Departamento di Asunto Social, en particular na e damanan Yvonne Bermudez y Sasha Geerman, como tambe na Ministerio di Asunto Social pa e confianza brinda na e organizacion durante e diez añanan aki.
