Preparando nan pa reintegra den comunidad:
ORANJESTAD (AAN) –Den entrevista cu director di Stichting Tienda di Educacion, Rhomyko Winklaar, el a menciona cu na 2022 nan a cuminza cu un proyecto piloto, pa tatanan cu ta na KIA.
Esaki ta pa e tatanan cu ta na KIA ora nan reintegra den comunidad por tin e hermentnan cu nan mester, mirando cu nan a keda un tempo ausente di nan famia y di sociedad.
Señor Winklaar a menciona cu hopi biaha a drenta den otro fase di bida caba, y ora cu e tatanan aki bay bek nan no sa con pa maneha e situacion.
Stichting Tienda di Educacion, hunto cu Fundacion pa Nos Muchanan, a uni forza pa nan por trece, den un concepto diferente, organizacionnan hunto manera Departamento di Salud (DVG), Famia Planea, Departamento di Asuntonan Social, Stichting Hunto, na un forma mas integral, y trece di tur un tiki pa papia cu nan, y pa nan sa tambe na final, na unda nan tin cu acudi ora nan tin pregunta, por ehemplo, tocante e fase di nan bida mes, of nan situacion financiero tambe, y ademas riba e desaroyo di nan yiunan.
Señor Winklaar a duna di conoce cu nan a zorg pa traha un pakete completo di esaki, sea pa tata cu ta biba of no, cu nan yiunan. Den caso cu e tata ta encarcela, naturalmente, esey ta bisa caba cu e no ta bibando cu su yiunan e momento ey, pero un dia e tin cu bay bek y bolbe integra den comunidad, y su tarea como mayor ta continua. Y eynan ta na unda nos kier reinforza pa un tata, ora e bay cas bek e por ta e miho tata posible pa su famia. El a comete un eror, e tabata encarcela pa un tempo, pero esey no ta kita afo su tarea como tata.
“E momento cu e bay bek e tin cu duna cara na esey. E tin cu enfrenta bek su responsabilidad como tata”, señor Winklaar a señala. El a agrega cu nan a amplia e cantidad di detenidonan y awo nan tabata tin un grupo basta grandi e biaha aki, y di diferente edad y nacionalidad. Pues no ta solamente pa hendenan local, pero pa esnan cu tin descendencia di otro pais. “Nos ta zorg aworaki pa duna nan informacion necesario. Nos tabata tin un grupo hopi amical cu a traha hopi bon cune, y asina por duna nan un tiki di locual ta nos custumbernan kico ta locual ta wordo verwacht di nan como mayor”, señor Winklaar a indica.
