ORANJESTAD (AAN): Vakantie ta andando, y ta momento special pa crea memoria, responsabilidad y preparacion.
Esey ta e pensamento di Tienda di Educacion na Aruba, y ta bin aki cu algun tip balioso pa yuda mayornan cu ne.
Nan ta sugeri pa yuda na cas ta siña bo yiu(nan) traha den team, independencia, confiansa y respet pa e espacio cu boso ta comparti cu otro. Durante e vakantie aki, bo por duna responsabilidad cu ta cuadra cu edadnan di bo yiu(nan), manera e.o.: (*) Organisa co’i hunganan of espacio personal. (*) Drecha cama. (*) Muha matanan. (*) Drecha/pone mesa pa come. (*) Dobla paña. (*) Yuda prepara cuminda. (*) Cuida bestianan na cas, etc.
Tareanan di cas ta un manera pa contribui, siña habilidadnan di bida y ta mustra bo yiu(nan) cu nan ta parti importante di famia. Scohe un responsabilidad cu lo por practica e siman aki.
