Ex Miembro (DP) di Conseho Insular di Curacao Jeannette (Jenny) Cratz
*Betico Croes a destrui e poder y arma di 12-8 y Federacion di Antillas
*Augustus 1977 ta prueba cu logro di Betico Croes ta unico den historia
ORANJESTAD(AAN)—Mas y mas por tuma nota di falsificacion di hechonan cu a conduci directamente na e culminacion di e lucha di Betico Croes pa Status Aparte di Aruba, cu a bira realidad Dia Prome di Januari 1986.
E momento a yega pa entrega generacionnan cu no a nace ainda ora cuarenta aña pasa, Aruba a yega na culminacion di su lucha pa deshaci di e lugar inferior cu e tabata ocupa den e constelacion di Antia Hulandes.
Na 1977, e confrontacion entre Aruba y Curacao a culmina, cu Aruba exigiendo cambio di Statuut pa e por bira pais den Reino y asina realmente por dicidi pa su propio destino.
1977 a entrega Aruba mas forza pa lucha pa su derecho pa asumi responsabilidad estatal propio den Reino, basa riba sucesonan cu a presenta.
E sosten di Pueblo Arubano na Betico Croes a bini dilanti den su victoria electoral abrumador, cu a opone e victoria abrumador cu Partido Democraat di Curacao a ricibi na Curaco.
Mientras Aruba a tuma e decision cu e kier un cambio den e relacionnan den Reino Hulandes y como pais kier tin lazo directo cu Hulanda, na Curacao, Partido Democraat a introduci e concepto di Federacion como base di su campaña politico.
Antia Hulandes a wordo confronta cu un situacion caminda Pueblo di Curacao na duna sosten historico na Partido Democraat pa e posicion contra Status Aparte di Aruba, mientras Pueblo di Aruba a duna sosten total na e partido MEP di Betico Croes, cu a a haya e gran mayoria di voto di Aruba.
Ta na e momento, historia a entrega prueba na Aruba cu e formula di 12 asiento pa Curacao y 8 asiento pa Aruba den Parlamento di Antillas Hulandes, a destrui e lucha di Betico Croes, cu a enfrenta sutuacionnan hasta doloroso di humiliacion como un lider.
E cambio di ley electoral na 1950, ora partido AVP a bay di acuerdo pa deshaci di e igualdad den Parlamento di Antia entre Aruba y Curacao a bira e arma contra Aruba den e forma cu e partido mayoritario di Aruba, no por a lucha contra e decision di e partido mayoritario di Curacao, cu a forma e Gobierno Boy Rozendal cu e partido minoritario PPA di Aruba, cu no tabata di acuerdo cu Status Aparte di Aruba.
Ta e situacion aki a conduci directamente na e asina yama Augustusdagen di Aruba, ora Betico Croes a dirigi accionnan pa bay contra Gobierno Boy Rozendal, loke a resulta den accion di Polis contra dirigentenan y votadornan di MEP.
Ora mira atras, e realizacion di Status Aparte di Betico Croes, tabata mucho mas cu un posicion cu un partido politico a tuma y pa cual el a lucha den Parlamento of haciendo uzo di reglanan legal y democratico na e pais.
E lucha pa Status Aparte di Aruba a wordo determina dor di Pueblo di Aruba cu no firmanan ni palabranan bunita di cualkier otro lider, manera awor na tanto ocasion kier pretende, pero directamente un lucha hasta sangriente den cual Arubianan a wordo detene, Arubianonan bou guia di Betico Croes, a pone hasta nan bida y bienestar na peliger pa e causa nacional di Aruba.
Den seno di Reino Hulandes, cu a conoce e lucha pa Status Aparte directamente, Betico Croes ta keda e unico lider autentico di e lucha di Status Aparte cu a bira e victoria di Pueblo di Aruba.
No por permiti ladronicia di logro di Betico Croes, cu a cera su historia politico na 1985, na vispera di Status Aparte na un forma cu a aumenta e respet internacional hasta di personanan cu a bay contra e lucha di Status Aparte, pa e forma cu el a cumpli cu su palabra, a hiba e lucha di Status Aparte y entrega na Reino Hulandes e formula di reorganisacion estatal di Reino Hulandes.
E respet den Reino Hulandes pa Betico Croes como realizador di Status Aparte, sigur ta wordo demostra den e forma cu directamente su concepto di cambio estatal, a bira cambio estatal pa Curacao y Sint Maarten.
E lucha y logro di Betico Croes ta unico den historia di Aruba y a haci cu e ta goza respet di su contrincantenan.
