Parlamentario Ricky Hoek (MEP):
ORANJESTAD (AAN): Den un rueda di prensa na comienso di e luna aki, mi a pone atencion na e importancia di luna di maart pa e tereno social tanto na nivel global y local.
Dia 15 di maart ultimo tabata Dia Mundial di Trabou Social y durante henter e luna tin diferente actividadnan relaciona cu e topico aki.Sinembargo, diadomingo 27 di maart 2022 den oranan di merdia/atardi Tereno Social na Aruba a keda paralisa ora cu a ricibi e tristo noticia cu e Tereno Social na Aruba a perde un icono den dicho area.
Ta trata di sr. Francisco Celaire, awo den feliz memoria. Sr. Francisco Celaire ta un Trahado Social di curason, cu un pasion grandi pa e profesion y empatia enorme cu e tabata tin pa cada ser humano cu a bin busca asistencia cerca dje, pa un colega, pa su comunidad.
Sr. Celaire tabata un trahado social profesional cu a traha cu e organisacion Osticeba (cu centronan di bario) y pa hopi aña tabata director di Samba, cu tabata guia personanan cu problema di adiccion. Banda di eherce e profesion di Trahado Social, Sr. Celaire tabata un maestro di Colegio Arubano y a duna e materia di ‘Maatschappijleer’ y Sr. Celaire a contribui grandemente riba tereno di trabou boluntario.
E mas sincero palabra di condolencia na famianan, amistadnan, ex-coleganan di tereno social di Sr. Celaire. Cu Sr. Celaire sosega na paz.
