Preocupacion creciente di comunidad Arubano pa situacion regional
*Republica Dominicano atento pa impacto desaroyo serio na Haiti
*Maduro ta acusa Merca di creacion basenan militar na Guyana
ORANJESTAD (AAN) — “Seguridad nacional di Aruba na e momentonan aki ta e gran prioridad mientras tension na varios pais importante pa Aruba, ta escala diariamente.”
Esaki ta e informacion ricibi di informantenan di DIARIO, cu ta indica cu den comunidad di Aruba tin un preocupacion creciente debi na e hecho cu e paisnan den e region cu ta confronta problemanan serio, ta paisnan di origen di un cantidad importante di miembronan di comunidad di Aruba.
Na e momentonan aki mas cu nunca, comunidad di Aruba mester ricibi informacionnan regional, debi na e importancia cu nan tin pa un parti importante di e comunidad, cu sea ta di origen di e paisnan en cuestion, of tin lazonan familiar of amistoso cu e paisnan aki.
E pais cu na e momentonan aki ta den circumstancianan cu ta wordo considera caotico ta Haiti, caminda segun informacionnan cu ta alcansa DIARIO, mester papia di un desastre humano.
E problemanan actual a cuminsa for di mas cu un aña pasa y a alcansa un situacion cu ni Nacionnan Uni ta capaz pa atende mas.
Ta wordo papia di un drama humano, cu mas cu un Miyon di persona cu ta sufri di falta di cuminda di cual un cantidad ta muri di hamber.
Maleza ta ataca bida humano na Haiti, cu un poblacion cu ta trata na yega na e frontera cu Republica Dominicana, cu ya a tuma accion pisa contra e filanan di Haitianonan cu ta bandona nan pais, caminda e bida cu nan mester hiba, ya no por wordo considera humano.
Esaki ta haci cu na e momentonan aki, Republica Dominicana tambe ta den un problema pasobra e mester defende su propio comunidad contra e desaroyonan cu ta tumando lugar na Haiti y e aumento enorme di violencia cu ta wordo registra.
Informantenan ta cualifica e situacion di Haiti como desesperacion, cu ta motibo cu e poblacion di e pais, ta dispuesto pa enfrenta tur peliger pa por cruza frontera y yega Republica Domincana.
Gobierno Dominicano a tuma medidanan importante den cual e construccion di e muraya entre Republica Dominicana y Haiti, sigur ta marca historia.
Informantenan ta mustra riba e cantidad di personanan cu ta di origen Haitiano y cu a bira miembro di e comunidad Arubano, cu ta hopi pendiente pa loke ta trata na Haiti sin cu nan por ofrece ayudo debi na e situacion caotico di e pais.
Ciudadanonan di Aruba di origen Dominicano, ta sigui informacionnan y tur e pasonan cu ta wordo tuma dor di e Gobierno Dominicano enfrente e realidad actual.
Mientrastanto no ta solamente e isla Hispañola, forma pa e prome Republica independiente den region di Caribe, Haiti, y Republica Dominicana ta motibo di preocupacion na Aruba.
E situacion na Venezuela ta sigui duna motibo pa preocupacion cada dia. E relacionnan entre Nicolas Maduro y e lider Ruso Putin, sigur ta duna motibo pa preocupacion na momento cu Nicolas Maduro ta sigui cu su esfuerzonan pa anexa Essequibo cu ta parti di Guyana.
Nicolas Maduro pa sostene su accionnan ta acusa Merca di kier establece un base militar na Guyana.
E acusacionnan aki, cu ta sostene e motibo cu Maduro a duna pa e por a introduci un Ley cu ta regla Essequibo como parti di e teritorio Venezolano. Esaki ta haci cu regimen di Nicolas Maduro, ta considera cu dos tercera parti di Guyana, ta teritorio Venezolano.
Eleccionnan na Venezuela ta acerca. Eleccionnan cu no tin ningun indicacion cu nan lo restora democracia na Venezuela, manera Nicolas Maduro a priminti Biden cu na su turno a deshaci di medidanan economico contra Nicolas Maduro.
Ayera un grupo di Venezolano atrobe a pidi Gobierno Mericano pa bolbe impone medida contra regimen di Nicolas Maduro y evita cu e poder di petroleo por wordo uza dor di Nicolas Maduro contra eleccionnan liber na Venezuela.
Informantenan a mustra DIARIO, cu na e momentonan aki, Aruba como uno di e poco islanan cu realmente ta registra adelanto economico y prosperidad creciente, mester ta cauteloso y cu e poblacion mester ta bon informa di e desaroyonan den e region Caribense.
Ya hopi medida di seguridad nacional a wordo tuma segun informantenan, cu sigur ta di opinion cu e Pueblo di Aruba mester ricibi tur informacion necesario pa por duna su aporte den e garantia necesario pa seguridad nacional cu ta depende di Gobierno pero tambe di Pueblo.
