ORANJESTAD (AAN): Un temblor cu a spanta basta hende na Aruba riba Dialuna marduga, y a hasta spierta esnan drumi, a keda registra pa 3:04 am.
Dialuna 13 di Juni 2022, e epicentro di e temblor di 3:04 am a wordo localiza na 12.18º Nort, y 70.11º West. Esaki ta exactamente 35 km Zuidwest di Refineria na San Nicolas, igual cu 38 km Zuid-Zuidwest di Wilhelmina Park na Playa. E epicentro ta riba lama, net 11 km pabao di Cabo San Roman, na peninsula di Paraguana na Venezuela.
E magnitud a wordo registra na 2.6º riba Scala di Richter, y e epicentro tabata na un profundidad di 65 km bao tera.
Hopi hende a sinti nan cas tril, y e sonido cu a bay acompaña cune tabata uno fuerte tambe. Sinembargo ningun informe a drenta di daño material na Aruba.
