ORANJESTAD (AAN): Tabata Diabierna pa exactamente 1:16 pm y 58 seconde, cu un temblor a keda registra riba Lama Caribe, na parti Noordwest di Aruba.
E epicentro di e temblor aki a wordo localiza na 12.83º Nort y 70.64º West. Esaki ta como 68 kilometer West-Noordwest di Faro di California na Aruba. E ta igual cu 72,5 km West-Noordwest di Misa di Noord. E ta igual cu 79,7 km Noordwest di Misa di Santa Cruz.
E magnitud di e temblor aki a wordo registra na prome instante na 3.1º riba Scala di Richter, pero despues di analisa e Seismogram, a hisa esaki na 3.3º grado.
Na comienso e epicentro a registra como uno basta profundo, pues el a wordo localiza na 59 km bao superficie di tera. Sinembargo revisando tur instrumento, a bin realiza cu e epicentro ta nada hundo y ta djis hopi superficial. Oficialmente el a bira uno cu ta menos di 30 km hundo.
Manera por mira riba e sismogram aki, e temblor aki a keda sacudi pa como 1 minuut largo.
Sinembargo ningun informe a drenta di hendenan cu lo a sinti esaki na Aruba. Esaki ta bin debi cu e momento ey ya tabatin basta yobida tumando lugar riba e isla, y e sonido di awacero cu biento lo a stroba hende di sinti e temblor. Tambe ta bin debi cu e ta uno basta superficial, pues no ta wordo sinti hopi leu.
Diasabra mainta un otro leve: Tin di menciona cu Diasabra mainta, 27 Juli 2024 pa exactamente 7:18 am, a registra un otro temblor basta leve di apenas 2.1º grado riba Scala di Richter, y esaki tabatin su epicentro na como 35 km pariba di ciudad di Coro na estado Falcon. E ta basta leu, esta 135 km Zuid-Zuidoost di Baby Beach na San Nicolas. Esun aki su epicentro tabata na 11.53º Nort y 69.34º West.
