Parlamentario Alvin Molina:
ORANJESTAD (AAN) – “Ora un delito wordo cometi, tin dos parti cu ta envolvi. Di un banda bo tin esun cu comete e hecho castigable y di otro banda bo tin esun cu ta sufri e consecuencia di e acto ey. E victima”. Asina Parlamentario Alvin Molina, di fraccion di MEP, a bisa den conferencia di prensa Diaranzon mainta, refiriendo na e tema di criminalidad hubenil na Aruba.
Molina a splica cu ultimo tempo, tin hopi preocupacion aki na Aruba pa e seguridad y esey ta hendenan local mes ta vocifera esey, segun e parlamentario, y specificamente e actonan penal, cu ta wordo cometi door di e hobennan; esnan menor di edad.
E parlamentario a bisa cu por parti e preocupacion aki, den tres punto: na prome lugar e actonan castigable mes cu ta wordo cometi, cu ta afecta e seguridad di e pueblo y e trankilidad den e barionan. Hasta ta afecta e unico pilar economico di Aruba, esta e turismo. Na di dos lugar, frecuentemente por mira cu e actonan aki ta wordo comete door di menornan di edad; eigenlijk, door di muchanan.
E ta puntra su mes ki señal esaki ta duna pa nos comunidad. “Unda nos ta bayendo fout?”, “Kico nos por drecha?”, “Unda nos por mehora?”, “Di con e muchanan ta desaroyando na un manera cu nan ta bay den mal caminda?”
E factornan por ta situacionnan social of familiar, den enseñanza, den bario mes, den tereno deportivo, eigenlijk hasta actividadnan cultural of di diversion, cu tambe por contribui na inseguridad.
Molina a acentua cu esey tur ora e ta bisa, y e lo sigui enfoca riba esaki, pasobra seguridad den nos isla ta mucho mas cu djis gara nan y cera nan den KIA. Esaki ta trece e parlamentario na su di tres punto riba e tema aki.
“Ta con pa trata e menornan di edad aki, cu ta comete e actonan penal aki? Ta cera nan pariba, boei nan man y tira e yabi afo? Nos ta ripara cu den nos comunidad mes tin hopi diferencia di opinion pa cu esaki. Hasta den Parlamento, nos por papia tambe dianan largo riba e tema aki, y na final nos tur ta kere cu nos tin razon; eigenlijk nos a papia y debati hopi riba e tema aki, durante e ultimo reunionnan publico unda casonan lamentable actual a bin dilanti, mocionnan a wordo presenta, y esey a pone mi sugeri cu nos ta bay trata e topico aki, como un agenda ‘punt apart’ anto den Parlamento mes”, Parlamentario Alvin Molina a señala.
