Awe ta Dia Internacional di Hubentud:
ORANJESTAD (AAN) – Awe, Diasabra 12 di Augustus, ta Dia Mundial di Hubentud. E aña aki, e campaña ta enfoca den e resiliencia, ingenio y liderazgo di e hobennan riba asuntonan cu ta afecta e mundo futuro.
Tabata na December 1999 cu Asamblea General di Nacionnan Uni, a establece e celebracion di e dia aki y a hacie riba 12 di Augustus siguiendo e recomendacionnan di e Conferencia Mundial di Ministernan responsable pa e hubentud, celebra na Lisboa dia 12 di Augustus 1998.
Su proposito ta honra e rol di e hobennan como agentenan di cambio, y e tema pa 2023 ta “E hobennan como agentenan di cambio pa e obhetivonan mundial”.
Organizacion di Nacionnan Uni ta referi na e transicion ecologico y ta purba di reforza e adkisicion di e competencianan ecologico y habilidadnan berde, cu ONU ta defini como e conocemento, capacidad, balor y actitudnan necesario pa biba, desaroya y apoya un sociedad sostenible y eficiente den e uso di e recursonan existente.
Un idea destaca di e campaña aki ta e efecto di cu e tumamento di decisionnan den e trabao y bida por eherce den e medio ambiente.
Ademas, banda di reconoce e importancia di e aspecto aki den personanan di tur edad, ta reconoce e papel prioritario cu e hobennan tin, ya cu nan lo contribui den e transicion ecologico durante un largo tempo.
DIARIO ta felicita tur nos hobennan den nan dia aki tan special, y ta desea tur sorto di exito den nan estudio awo y den futuro. Dios bendiciona boso tur y boso famianan!
