ORANJESTAD (AAN): Kimberly de Cuba di Telefon pa Hubentud a indica cu tur aña den luna di April ta busca boluntarionan nobo.
No ta asina cu nan no tin boluntario, actualmente nan tin 30 boluntario activo.
E parti di boluntarionan ta yuda Telefon pa Hubentud cu servicio di telefoon, email y chat, cu nan ta brinda na muchanan tur dia di 2'or di atardi te cu 6'or di atardi. Ta exactamente den e oranan aki cu nan ta buscando mas boluntario pa yuda den oranan aki, cu tin hopi energia, tempo liber y interes cu kier yuda door di scucha e mucha y hobennan.
Segun señora de Cuba, Telefon pa Hubentud no ta exigi pa e boluntario tin cualkier estudio of diploma, cualkier persona por bira boluntario. Nan mes ta duna un training, cu ta tuma lugar den luna di Mei, parti den 10 anochi, pa motibo cu tin hopi hende ta traha den dia. E edad minimo cu nan ta exigi ta 16 aña, pero no tin un edad maximo.
Idioma tampoco ta un exigencia, mirando cu nan ta haya yamada di mucha y hobennan cu ta papia diferencia idioma. Si ta un idioma cu e boluntario no ta domina, e por pasa esaki na otro boluntario pa yuda.
Ta importante pa menciona cu Telefon pa Hubentud cu nan ta yuda Saba y St Eustatius, kiermen e parti di ingles ta importante, pero no ta un exigencia. Aki pronto nan lo cuminsa duna servicio na Bonaire, y nan ta domina e idioma di Papiamento y esaki lo ta mas facil pa nan boluntarionan.
