PARIS: Un teenager a fayece na pueblo di Mâcon den e region Bourgogne na parti pariba di Francia, ora cu su smartphone a cay den un badkuip.
Polis a yega y a logra reanima e dama hoben, pero finalmente el a fayece debi na e gravedad di su heridanan.
E hoben di 13 aña di edad a wordo identifica como Celestine, a pasa un anochi cu su amiganan na su cas, segun e corant local ‘Le Journal de Saône-et-Loire’.
Un team di Polis a responde prome na e emergencia ora cu e mayornan a bati alarma, y a logra di reanima e teenager danki na un maniobra rapido di CPR. Asina nan a transporte den situacion critico na un Hospital na Lyon. Un otro amiga di e victima tambe a wordo hospitaliza den situacion di shock na Hospital.
Autoridadnan a habri un investigacion pa haya sa e circunstancianan exacto di e accident aki.
E mama di e dama hoben a papia cu e corant ora cu su yiu ainda tabata den coma, pa asina concientiza demas famianan di e riesgo aki. “Ban laga otro hobennan siña di loke a socede aki, pasobra nan tin nan smartphone pega na nan man,” el a bisa.
