Fiscal Paesch:
ORANJESTAD (AAN): Recientemente DIARIO a entrevista Mr. Zamira Paesch kende ta fiscal di Ministerio Publico, riba diferente caso penal incluyendo ;hit and run’.
Paesch a splica cu na e momento cu bo ta envolvi den un accidente di trafico bo ta obliga pa ley pa para pa warda te ora cu polis bin of un persona cu ta asigna pa minister di Husticia pa atende cu e accidente.
“Na momento cu bo sa cu bo ta envolvi den un accidente y bo a sigui core bay, bo ta haci bo mes culpable na ‘doorrijden’ y esey tin un castigo riba dje”.
Ora cu OM haya e procesverbal di polis, polis ta bay haci un investigacion y lo determina kende tabata e chauffeur, pa asina bay te su cas pa busca un declaracion, segun e fiscal.
El a splica cu na momento cu e procesverbal final yega OM, e ora ey ta tuma un decision si lo duna e persona un boet, of invite pa un asina yama Tomzitting na Ministerio Publico.
Segun Paesch, si bo ta envolvi den un accidente bo tin cu para, te hasta si no ta abo a ocasiona esaki.
