E fiesta lo ta na Paradera dia 29 di December:
*Legado di Harry Croes ta celebra su 51 edicion
ORANJESTAD (AAN)—Luigi di Fundacion Arugaldo ta invita henter pueblo di Aruba, pa tuma bendicion pa 2024, durante e actividad na Paradera.
Asina el a expresa den conferencia di prensa na Unoca. El a haci un yamada na tur esnan cu tin un cuarta, tambor sea ta toca bon of ta toca malo, y esnan cu ta canta bon of malo, pa presenta dia 29 di December, pa bin bao palo banda di e rotonde di Paradera, y asina trece ambiente.
Palabranan di gradicimento el a expresa pa UNOCA, y diferente sponsornan pa nan colaboracion pa haci e evento aki posibel.
E evento ta cuminza 6 or te cu 10 or, y di e rotonde di Paradera lo sigui pa e Festival di Dande di Adulto cu lo tuma lugar den Club Caiquetio, y manera el a priminti e pionero di e Festival di Dande Adulto, señor Harry Croes(dfm), e evento aki ta sigui. El a reitera cu e ta spera Aruba completo na rotonde di Paradera dia 29 di December. “Dande ta di nos y e ta sigui”, el a bisa pa finaliza.
El a pasa palabra pa e Fundacion Cultural y Festivalnan Folklorico, cu a remarca cu no por keda afo e celebracion di 51 aña di Festival di Dande, categoria adulto. E evento ta cuminza pa 8 or di anochi, manera a wordo menciona e lo tuma lugar na Club Caiquetio. Inscripcion a habri dia 1 di December y ta cera Diaranzon di e siman aki, dia 20 di December.
Esaki ta un evento grandi combina cu e actividad di Arugaldo na rotonde di Paradera, dia 29 di December. Categorianan cu lo ta topando cu ne, den e festival di Dande Adulto ta: Dande, Tipico, Propio Composicion. Esaki lo ta un festival legendario cu su Baluarte Harry Croes a sa di crece, te unda cu e ta awe, y cu e Fundacion lo sigui cu su legado, e aña aki edicion 51. Por inscribi via pagina online: via facebook “fundacion cultural di festivalnan folklorico”. Tambe por haci’e via telefonico.
